പത്തനംതിട്ട: പത്തനംതിട്ട നിയോജക മണ്ഡലത്തിൽ തന്റെ വിജയത്തിൽ നൂറ് ശതമാനം ആത്മവിശ്വാസമുണ്ടെന്ന് എൻ.ഡി.എ സ്ഥാനാർത്ഥി കെ സുരേന്ദ്രൻ പറഞ്ഞു. ഇടത്, വലത് മുന്നണികൾ പരാജയഭീതിയിലാണ്. അതുകൊണ്ടാണ് കൊട്ടിക്കലാശ ദിവസം തന്റെ പ്രചാരണ വാഹനം തടഞ്ഞതെന്ന് കെ.സുരേന്ദ്രൻ കൂട്ടിച്ചേർത്തു.

പൊൻകുന്നം, കാഞ്ഞിരപ്പള്ളി തുടങ്ങി പലയിടത്തും സി.പി.എം പ്രവർത്തകർ തന്നെ തടഞ്ഞുവച്ചു. പരാജയം ഉറപ്പായപ്പോൾ എതിരാളികൾ അക്രമത്തിന്റെ വഴിയിലാണെന്നും സുരേന്ദ്രൻ ആരോപിച്ചു. തിരഞ്ഞെടുപ്പ് പ്രചാരണകാലത്ത് തനിക്കെതിരെ മ്ലേച്ഛമായ വ്യക്തിഹത്യയും അശ്ലീല പ്രചാരണങ്ങളും ജാതി അധിക്ഷേപങ്ങളുമാണ് നേരിട്ടത്. എന്നാൽ പത്തനംതിട്ടയിൽ താൻ വിജയിക്കുമെന്ന കാര്യത്തിൽ ഒട്ടും സംശയമില്ലെന്നും അദ്ദേഹം വ്യക്തമാക്കി. നിശ്ശബ്ദ പ്രചാരണ ദിവസമായ ഇന്ന് പ്രചാരണത്തിരക്കിൽ വിട്ടുപോയവരെ നേരിട്ട് കാണണം. എല്ലാ മണ്ഡലങ്ങളിലും ഓടിയെത്തുമെന്നും സുരേന്ദ്രൻ പറഞ്ഞു.