കണ്ണൂർ: മയ്യിൽ കണ്ടങ്കൈ എൽ പി സ്കൂളിലെ 145 നമ്പർ ബൂത്തിൽ വി.വി പാറ്റ് മെഷീനുള്ളിൽ പാമ്പിനെ കണ്ടെത്തി. മോക്ക് പോൾ സമയത്താണ് മെഷീനുള്ളിൽ പാമ്പിനെ കണ്ടത്. തുടർന്ന് പാമ്പിനെ നീക്കം ചെയ്യാനുള്ള ശ്രമത്തിലാണ് അധികൃതർ. അതേസമയം,​ വോട്ടിംഗ് മെഷിനെതിരെ വ്യാപക പരാതി ഉയരുകയാണ്. എറണാകുളം മറൈൻ ഡ്രൈവ് സെന്റ് മേരീസ് സ്‌കൂൾ ബൂത്തിൽ യന്ത്രത്തകരാറിനെ തുടർന്ന് ജനങ്ങൾ വോട്ടു ചെയ്യാതെ മടങ്ങുകയാണ്. പകരം യന്ത്രമെത്തിച്ചെങ്കിലും അതും പ്രവർത്തനരഹിതമാണ്. ഒരു മണിക്കൂറായി കാത്തുനിന്നവരാണ് മടങ്ങുന്നത്.

വോട്ടിംഗ് യന്ത്രത്തിന്റെ കാര്യക്ഷമത ഉറപ്പാക്കൽ വേണ്ടത്ര ഗൗരവത്തോടെ തിരഞ്ഞെടുപ്പ് കമ്മിഷൻ എടുത്തില്ലെന്ന് മുഖ്യമന്ത്രി പിണറായി വിജയൻ ആരോപിച്ചു. "വോട്ടിംഗ് യന്ത്രങ്ങൾക്ക് തകരാറില്ലെന്ന് കമ്മിഷൻ ഉറപ്പുവരുത്തേണ്ടതായിരുന്നു. വോട്ടിംഗ് യന്ത്രത്തെക്കുറിച്ച് നേരത്തെ ഉയർന്ന പരാതികൾ ഓർക്കേണ്ടതായിരുന്നു"വെന്നും മുഖ്യമന്ത്രി പറഞ്ഞു.