കൽപ്പറ്റ: വയനാട്​ ലോക്​സഭാ മണ്ഡലത്തി​ൽ വോട്ടിംഗ്​ യന്ത്രത്തിൽ തകരാറെന്ന പരാതി ഉയർന്നതോടെ റീപോളിംഗ്​ ആവശ്യപ്പെട്ട്​ എൻ.ഡി.എ സ്ഥാനാർഥി തുഷാർ വെള്ളാപ്പള്ളി രംഗത്തെത്തി. മൂപ്പനാട്​ പഞ്ചായത്തിലെ ബൂത്ത്​ നമ്പർ 79 ൽ വോട്ടിംഗ്​ യന്ത്രം തകരാറിലായിട്ടും പോളിംഗ് തുടർന്നെന്നും റീപോളിംഗ് നടത്തണമെന്നും തുഷാർ ആവശ്യപ്പെട്ടു.

രണ്ടു തവണ അമർത്തിയിട്ടും വോട്ട്​ രേഖപ്പെടുത്തിയില്ലെന്നാണ്​ പരാതി. ഇക്കാര്യം ശ്രദ്ധയിൽപെടുത്തിയിട്ടും യന്ത്രം മാറ്റിയി​ല്ലെന്നും അതിനാൽ റീപോളിംഗ്​ നടത്തണമെന്നും ആവശ്യപ്പെട്ട്​ തുഷാർ മുഖ്യ തിരഞ്ഞെടുപ്പ്​ ഏജന്റ് അഡ്വക്കറ്റ്​ സുനിൽ കുമാർ മുഖേന വരണാധികാരിക്ക്​ കത്ത്​ നൽകി.

അതേസമയം,​ ആദ്യ മൂന്ന് മണിക്കൂറിൽ തന്നെ വയനാട്ടിലും പത്തനംതിട്ടയിലും മികച്ച പോളിംഗാണ് രേഖപ്പെടുത്തിയത്. എല്ലാ പോളിംഗ് ബൂത്തുകളിലും രാവിലെ മുതൽ വോട്ടർമാരുടെ നീണ്ടനിരയായിരുന്നു. വയനാട് മണ്ഡലത്തിൽ പത്തരയോട് കൂടി 21.37 ശതമാനം പോളിംഗ് രേഖപ്പെടുത്തി. ബത്തേരിയിൽ 21.23 ശതമാനം പോളിംഗാണ് രേഖപ്പെടുത്തിയത്.