ന്യൂഡൽഹി : കാവൽക്കാരൻ കള്ളനാണെന്ന കോൺഗ്രസ് അദ്ധ്യക്ഷൻ രാഹുൽ ഗാന്ധിയുടെ പരാമർശത്തിനെതിരെയുള്ള കോടതി അലക്ഷ്യ കേസ് റാഫേൽ പുനഃപരിശോധന ഹർജിക്കൊപ്പം പരിഗണിക്കുമെന്ന് സുപ്രിംകോടതി. പരാമർശത്തിൽ ഖേദം പ്രകടിപ്പിച്ചുള്ള വിശദീകരണം അംഗീകരിച്ച് കേസ് തീർപ്പാക്കണമെന്ന രാഹുലിന്റെ ആവശ്യം കോടതി അംഗീകരിച്ചില്ല.
റാഫേൽ ഇടപാടിൽ ചൗക്കിദാർ ചോറെന്ന് സുപ്രീംകോടതി കണ്ടെത്തി എന്ന പ്രചാരണം വയനാട് മുതൽ അമേത്തി വരെ രാഹുൽ ഗാന്ധി നടത്തിയെന്ന് കോടതി അലക്ഷ്യ ഹർജി നൽകിയ ബി.ജെ.പി വക്താവ് മീനാക്ഷി ലേഖി വാദിച്ചു. ഈ പരാമർശത്തിൽ മാപ്പ് പറയാതെ ഖേദം പ്രകടിപ്പിക്കുക മാത്രമാണ് രാഹുൽ ഗാന്ധി ചെയ്തത്. കോടതി അലക്ഷ്യ നടപടികൾ തുടരണമെന്നും മീനാക്ഷി ലേഖി ആവശ്യപ്പെട്ടു.
രാഷ്ട്രീയ പ്രചരണം കോടതി ഉത്തരവുമായി ചേർത്തുപറഞ്ഞപ്പോൾ പിഴവ് പറ്റിയെന്നായിരുന്നു, രാഹുലിന് വേണ്ടി മനു അഭിഷേക് സിംഗ് വി അറിയിച്ചത്. കേസ് തീർപ്പാക്കണമെന്ന അഭിഷേക് സിംഗ്‌വിയുടെ ആവശ്യം കോടതി അംഗീകരിച്ചില്ല. വരുന്ന ചൊവ്വാഴ്ച റാഫേൽ കേസിലെ പുനപരിശോധന ഹർജിക്കൊപ്പം കോടതി അലക്ഷ്യ കേസും പരിശോധിക്കാൻ മാറ്റിവെച്ചു. രാഹുലിന് കോടതി അലക്ഷ്യത്തിന് നോട്ടീസ് അയക്കുകയും ചെയ്തു.
റാഫേൽ കേസിൽ പ്രധാനമന്ത്രി നരേന്ദ്ര മോദിക്ക് സുപ്രീംകോടതി ക്ളീൻ ചിറ്റ് നൽകിയെന്ന് ബി.ജെ.പി നടത്തുന്ന പ്രചാരണവും കോടതി അലക്ഷ്യമാണെന്ന് വാദത്തിനിടെ അഭിഷേക് സിംഗ് വി ചൂണ്ടിക്കാട്ടി.