കിളിമാനൂർ: ബസിൽ കുഴഞ്ഞുവീണ യാത്രക്കാരനെ സർവ്വീസ് നിറുത്തിവച്ച് ആശുപത്രിയിലാക്കി കെ.എസ്.ആർ.ടി.സി മാതൃക കാണിച്ചു. ഇന്ന് കാലത്ത് 9 നാണ് സംഭവം. ആയൂർ സ്വദേശി ഉണ്ണികൃഷ്ണ പിള്ളയാണ് (46) കൊട്ടാരക്കരയിൽ നിന്നും തിരുവനന്തപുരത്തേക്ക് വരികയായിരുന്ന ബസിൽ യാത്രാമദ്ധ്യേ കുഴഞ്ഞ് വീണത്.

ഉടൻ തന്നെ ഇദ്ദേഹത്തെ അടുത്തുള്ള സ്വകാര്യ ആശുപത്രിയിലെത്തിച്ചു. യാത്രക്കാരെ മറ്റൊരു കെ.എസ്.ആർ.ടി.സി ബസിൽ കയറ്റിവിട്ട ഡ്രൈവർ അജികുമാറും കണ്ടക്ടർ അനുരൂപും യാത്രക്കാരന്റെ ബന്ധുക്കളെ വിവരമറിയിച്ച് അവർ വരുന്നതുവരെ ആശുപത്രിയിൽ കാത്തിരിക്കുകയായിരുന്നു.