ചെന്നൈ: ചൈനീസ്​ ഹ്രസ്വ​ വീഡിയോ ആപ്ളിക്കേഷനായ ടിക്​ ടോക്കി​ന്​ ഏർപ്പെടുത്തിയിരുന്ന നിരോധനം മദ്രാസ് ഹൈക്കോടതി നീക്കി. ടിക്ടോക്കിലെ വിവാദ ഉള്ളടക്കങ്ങൾ നിയന്ത്രിക്കാൻ സംവിധാനം ഉണ്ടെന്ന കമ്പനിയുടെ വിശദീകരണം അംഗീകരിച്ചാണ് വിലക്ക് നീക്കാൻ മദ്രാസ് ഹൈക്കോടതി തീരുമാനിച്ചത്.

അശ്ലീലദൃശ്യങ്ങൾ സംപ്രേഷണം ചെയ്യുന്നില്ലെന്ന്​ ഉറപ്പ്​ വരുത്തണമെന്ന്​ കോടതി ടിക്​ ടോക്കിനോട്​ നിർദ്ദേശിച്ചിട്ടുണ്ട്​. അശ്ലീലദൃശ്യങ്ങൾ സംപ്രേഷണം ചെയ്​താൽ കോടതിയലക്ഷ്യമായി കണ്ട്​ തുടർനടപടികൾ സ്വീകരിക്കുമെന്നും മദ്രാസ്​ ഹൈക്കോടതി ടിക്​​ ടോക്കിനെ ഓർമിപ്പിച്ചു.

അശ്ലീല ദൃശ്യങ്ങൾ വ്യാപകമായി പ്രചരിക്കുന്നുവെന്ന പരാതിയെ തുടർന്ന് അഭിഭാഷകനായ മുത്തുകുമാർ നൽകിയ കേസിലാണ്​ ഏപ്രിൽ മൂന്നിന്​ ടിക്​ ടോക്കിന്​ നിരോധനം ഏർപ്പെടുത്തിയത്​. തുടർന്ന്​ ഏപ്രിൽ 18ന്​ ഗൂഗിൾ പ്ലേ സ്​റ്റോറിൽ നിന്നും ആപ്പിൾ സ്​റ്റോറിൽ നിന്നും ടിക്​ ടോക്ക് പിൻവലിച്ചിരുന്നു.

തുടർന്ന് കമ്പനി സുപ്രീംകോടതിയെ സമീപിച്ചു. സുപ്രീംകോടതി നിർദ്ദേശ പ്രകാരമാണ് കേസ് വീണ്ടും മദ്രാസ് ഹൈക്കോടതി പരിഗണിച്ചത്. നിരോധനം നീക്കിയതോടെ ആപ്ളിക്കേഷൻ വീണ്ടും പ്ലേ സ്റ്റോറിൽ ലഭ്യമാകും.