കൊച്ചി: സംവിധായകൻ അരുൺ ഗോപിയുടെ കാറിൽ ലോറി ഇടിച്ചു. അമിതവേഗത്തിൽ വന്ന ലോറി സംവിധായകന്റെ കാറിൽ ഇടിക്കുകയായിരുന്നു. ബി.എം‍.ഡബ്ല്യുവിലായിരുന്നു അരുൺഗോപി സഞ്ചരിച്ചിരുന്നത്. "അമിതവേഗത്തിൽ തന്റെ കാറിനെ മറികടന്ന് പോകാൻ ശ്രമിച്ച ലോറിയിടിച്ച് ജീവൻ നഷ്ടപ്പെടാതിരുന്നത് ബി.എം.ഡബ്ല്യുവിന്റെ ബലംകൊണ്ടും ഭാഗ്യം കൊണ്ടും മാത്രമാണെ"ന്ന് അരുൺഗോപി പറഞ്ഞു. കഴിഞ്ഞ ദിവസം അരൂരിൽ നിന്ന് കുടുംബവുമായി കൊച്ചിയിലെ വീട്ടിലേക്ക് പോകുമ്പോൾ രാത്രി 10.45നാണ് അപകടം നടന്നത്.

കൊച്ചി ലേമെർഡിയൻ ഹോട്ടലിന് മുന്നിലെ പാലത്തിൽ വച്ച് പുറകിൽ നിന്നു അമിത വേഗത്തിൽ എത്തിയ ലോറി മറ്റൊരു കാറിനെ മറികടക്കാൻ ശ്രമിക്കവെ അരുൺ സഞ്ചരിച്ചിരുന്ന വാഹനത്തിൽ ഇടിക്കുകയായിരുന്നു. വാഹനമിടിച്ചതറിഞ്ഞെങ്കിലും ലോറിയുടെ ഡ്രൈവർ നിറുത്താതെ പോയി. തുടർന്ന് പൊലീസിന്റെ സഹായത്തോടെ ലോറിയെ പിന്തുടർന്നു പിടിച്ചു. ഡ്രൈവർ മദ്യപിച്ചിരുന്നതായി സംശയമുണ്ടെന്നാണ് സൂചന. കാറിന്റെ വലതുവശം ഏകദേശം പൂർണമായും തകർന്നിട്ടുണ്ട്.