ന്യൂഡൽഹി: പ്രധാനമ​ന്ത്രി നരേന്ദ്രമോദിക്കും ബി.ജെ.പി ദേശീയ അദ്ധ്യക്ഷൻ അമിത്​ ഷാ​യ്‌ക്കുമെതിരെ നൽകിയ പരാതികളിൽ തിരഞ്ഞെടുപ്പ് കമ്മിഷൻ നടപടിയെടുക്കാത്തതിനെതിരെ കോൺഗ്രസ് സുപ്രീംകോടതിയിൽ ഹർജി നൽകി​. പരാതികളിൽ 24 മണിക്കൂറിനകം നടപടിയെടുക്കാൻ തിരഞ്ഞെടുപ്പ്​ കമ്മിഷൻ നിർദേശം നൽകണമെന്നാണ്​ കോൺഗ്രസിന്റെ​ ആവശ്യം. ഇതുസംബന്ധിച്ച് കോൺഗ്രസ്​ എം.പി സുസ്​മിത ദേവാണ്​ സുപ്രീംകോടതിയെ സമീപിച്ചത്​.

നരേന്ദ്രമോദിയുടെയും അമിത്​ ഷായുടെ വർഗീയതയുണ്ടാക്കുന്ന പ്രസംഗങ്ങൾക്കെതിരെ നടപടി വേണമെന്നാണ്​ കോൺഗ്രസിൻെറ പ്രധാന ആവശ്യം. ഇതിനൊപ്പം സൈന്യത്തെ രാഷ്​ട്രീയ​ നേട്ടത്തിനായി ഉപയോഗിക്കുന്ന ബി.ജെ.പി സമീപനത്തിനെതിരെയും കോൺഗ്രസിന്​ പരാതിയുണ്ട്​. ബി.ജെ.പി നേതൃത്വം തിരഞ്ഞെടുപ്പ് ദിവസം ഗുജറാത്തിൽ റാലി നടത്തി,​ സെെനികരുടെ പേരിൽ വോട്ട് തേടി,​ വർഗീയ ധ്രുവീകരണമുണ്ടാക്കുന്ന പ്രസ്താവനകൾ വ്യാപകമായി പ്രചരിപ്പിച്ചു തുടങ്ങിയവയാണ് കോൺഗ്രസ് മോദിക്കും അമിത്ഷായ്ക്കും നേരെ ഉന്നയിക്കുന്നത്.

പ്രതിപക്ഷ പാർട്ടികൾ ഇക്കാര്യത്തിൽ നിരവധി പാരാതികൾ നൽകിയിട്ടും നടപടിയുണ്ടാവാത്ത സാഹചര്യത്തിലാണ് കോൺഗ്രസിന്റെ ഈ നീക്കം. ഇതുമായി ബന്ധപ്പെട്ട് പ്രധാനമന്ത്രിക്കെതിരെ നൽകിയ പരാതി തിരഞ്ഞെടുപ്പ് കമ്മിഷന്റെ വെബ്‌സൈറ്റിൽ നിന്ന് നീക്കം ചെയ്യപ്പെട്ട വിഷയവും കോൺഗ്രസ് ചൂണ്ടിക്കാട്ടിയിട്ടുണ്ട്.