കൊൽക്കത്ത: പശ്ചിമ ബംഗാളിൽ നാലാംഘട്ട വോട്ടെടുപ്പിന്റെ ആദ്യമണിക്കൂറുകളിൽ വിവിധ പോളിംഗ് സ്റ്റേഷനുകളിൽ സംഘർഷം. സംഘർഷത്തിനിടെ അസനോളിൽ ബി.ജെ.പി സ്ഥാനാർത്ഥിയും കേന്ദ്രമന്ത്രിയുമായ ബാബുൽ സുപ്രിയോയുടെ വാഹനം തൃണമൂൽ പ്രവർത്തകർ തകർത്തു.

അസനോളിൽ ബൂത്ത്​ പിടിത്തം നടക്കുന്നുവെന്നറിഞ്ഞ്​ എത്തിയതായിരുന്നു മന്ത്രി. ബൂത്തിൽ തൃണമൂൽ പ്രവർത്തകരും സുരക്ഷാ ജീവനക്കാരും തമ്മിൽ സംഘർഷവും അരങ്ങേറി. അസനോളിലെ 199-ാം ബൂത്തിലാണ്​ സംഘർഷമുണ്ടായത്​.

അസനോളിലെ രണ്ടു ബൂത്തിൽ കേന്ദ്രസേന ഇല്ലാത്തതിനാൽ നാട്ടുകാരുടെ പ്രതിഷേധത്തെ തുടർന്ന്​ ​വോട്ടെടുപ്പ്​​ നിറുത്തിവച്ചിരുന്നു. ഇവിടെ കേന്ദ്രസേനയെ ഏർപ്പാടുചെയ്യാൻ വേണ്ട നടപടികൾ സ്വന്തം നിലയ്ക്ക്​ സ്വീകരിച്ചിട്ടുണ്ടെന്ന്​ സു​പ്രിയോ അറിയിച്ചു. കേന്ദ്ര സേനയുടെ സംരക്ഷണമില്ലെങ്കിൽ ശരിയാംവിധം വോ​ട്ടെടുപ്പ്​ നടക്കില്ലെന്ന്​ നാട്ടുകാർ തിരിച്ചറിഞ്ഞതിൽ സന്തോഷമുണ്ടന്ന്​ സുപ്രിയോ പറഞ്ഞു. ബിർഭും ലോകസ്ഭാ മണ്ഡലത്തിൽപ്പെട്ട നാനൂർ, രാംപുരാത്, നൽഹാത്തി തുടങ്ങിയ ഇടങ്ങളിലും കിഴക്കൻ ബർദുവാനിലെ ജെമുവ, ബരാബനി എന്നിവിടങ്ങളിലും തൃണമൂൽ, ബി.ജെ.പി പ്രവർത്തകർ തമ്മിൽ സംഘർഷമുണ്ടായി.

 സുപ്രിയോയ്ക്കെതിരെ കേസ്

അസൻസോളിൽ ബൂത്തിൽ കടന്നുകയറിയ കേന്ദ്രമന്ത്രിയും ബി.ജെ.പി സ്ഥാനാർത്ഥിയുമായ ബാബുൽ സുപ്രിയയ്‌ക്കെതിരെ കേസെടുക്കാൻ തിരഞ്ഞെടുപ്പ് കമ്മിഷൻ നിർദ്ദേശം നൽകി. സുരക്ഷാ ഉദ്യോഗസ്ഥർക്കൊപ്പം ബാബുൽ ബൂത്തിലേക്ക് അതിക്രമച്ചുകയറിയെന്നും മോശമായി സംസാരിച്ചുവെന്നും വോട്ടെടുപ്പിന് തടസമുണ്ടാക്കിയെന്നും ചൂണ്ടിക്കാട്ടിയാണ് സുപ്രിയോയ്ക്കെതിരെ നടപടി.