പാലക്കാട് : തനിക്കെതിരെ മോശം പരാമർശം നടത്തിയ എൽ.ഡി.എഫ് കൺവീനർ എ. വിജയരാഘവനെതിരെ ആലത്തൂരിലെ യു.ഡി.എഫ് സ്ഥാനാർത്ഥി രമ്യ ഹരിദാസ് ആലത്തൂർ ജുഡിഷ്യൽ മജിസ്‌ട്രേട്ട് കോടതിയിൽ ഹർജി നൽകി. വിജയരാഘവനെതിരെ പരാതി നൽകിയിട്ടും തുടർനടപടി സ്വീകരിച്ചില്ലെന്നും പൊലീസ് നീതി നിഷേധിച്ചെന്നും ഹർജിയിൽ പറയുന്നു. പൊന്നാനിയിലെ തിരഞ്ഞെടുപ്പ് പ്രചാരണ യോഗത്തിനിടെയാണ് വിജയരാഘവൻ രമ്യയെ അധിക്ഷേപിച്ച് സംസാരിച്ചത്. തുടർന്ന് രമ്യ ഇലക്‌ഷൻ കമ്മിഷനും ജില്ലാ പൊലീസ് മേധാവിക്കും പരാതി നൽകിയിരുന്നു. രണ്ടാഴ്ച പിന്നിട്ടിട്ടും തുടർ നടപടികൾ ഒന്നുമുണ്ടാവാത്ത സാഹചര്യത്തിലാണ് ഹർജി നൽകിയതെന്ന് രമ്യ പറഞ്ഞു.