കോന്നി : ഡി.വൈ.എഫ്.ഐ നേതാവിന്റെ വീട്ടുമുറ്റത്ത് റീത്തും വാഴയിലയും വച്ച് വധഭീഷണി. കോന്നി ബ്ലോക്ക് എക്‌സിക്യൂട്ടീവ് അംഗം മലയാലപ്പുഴ കുഴിക്കാട് മിഥുൻ.ആർ.നായരുടെ (അപ്പുണ്ണി) വീട്ടുമുറ്റത്ത് വെള്ളിയാഴ്ച്ച രാവിലെയാണ് റീത്തും വാഴയിലയും കണ്ടത്. റീത്തിൽ ആർ.എസ്.എസിന്റെ പേരിലുള്ള വധഭീഷണി കുറിപ്പുമുണ്ട്. നാലു വർഷം മുമ്പ് രാത്രിയിൽ പ്രകടനമായെത്തിയ ആർ.എസ്.എസ് പ്രവർത്തകർ അപ്പുണ്ണിയുടെ വീട് ആക്രമിച്ച് റീത്ത് വച്ചിരുന്നു. മലയാലപ്പുഴ പൊലീസിൽ പരാതി നൽകി. ഡി.വൈ.എഫ്.ഐ ജില്ലാ കമ്മിറ്റി പ്രതിഷേധിച്ചു. പൊലീസ് അന്വേഷണം നടത്തി കുറ്റക്കാർക്കെതിരെ നടപടി സ്വീകരിക്കണമെന്ന് ഡി.വൈ. എഫ്.ഐ ജില്ലാ പ്രസിഡന്റ് സംഗേഷ്.ജി.നായർ,സെക്രട്ടറി പി.ബി.സതീഷ് കുമാർ എന്നിവർ പറഞ്ഞു.