പുനലൂർ: തുണി ഇസ്തിരിയിട്ട് നൽകുന്ന കടയ്ക്ക് തീ പിടിച്ച് ഉറങ്ങി കിടന്നിരുന്ന കടയുടമ വെന്തു മരിച്ചു. പുനലൂർ രാംരാജ് തിയേറ്ററിന് സമീപം കാഞ്ഞിയിൽ വീട്ടിൽ ഐസക്ക് അലക്സാണ്ടറാണ് (68)മരിച്ചത്. ഇന്നലെ പുലർച്ചെ മൂന്നുമണിയോടെയായിരുന്നു സംഭവം. ഓട് മേഞ്ഞ കടയ്ക്കും വീടിനുമാണ് തീ പിടിച്ചത്. സംഭവ സമയത്ത് ഐസക്ക് മാത്രം വീടിനുള്ളിൽ കിടന്ന് ഉറങ്ങുകയായിരുന്നു.തുണികളും വീട്ടുപകരണങ്ങളും പൂർണ്ണമായും കത്തിനശിച്ചു. സമീപത്തെ കടകളിലേക്ക് പടരാതെ ഫയർഫോഴ്സ് തീ കെടുത്തി. ഷോർട്ട് സർക്യൂട്ടാണ് അപകടകാരണമെന്ന് കരുതുന്നു. പുനലൂർ സി.ഐ മോഹൻദാസിന്റെ നേതൃത്വത്തിൽ ഡോഗ് സ്ക്വാഡും ഫിംഗർപ്രിന്റ് വിദഗ്ദ്ധരും പരിശോധന നടത്തി. മൃതദേഹം തിരുവനന്തപുരം മെഡിക്കൽ കോളേജ് ആശുപത്രിയിൽ പോസ്റ്റ് മോർട്ടത്തിന് അയച്ചു. പോസ്റ്റ് മോർട്ടം റിപ്പോർട്ട് ലഭിച്ചാലെ മരണ കാരണം വ്യക്തമാകൂ എന്ന് സി.ഐ അറിയിച്ചു. ഭാര്യ: ഹെലൻ. മക്കൾ: അഭിലാഷ് ഐസക്ക്, ആദർശ് ഐസക്ക്.