കൊല്ലം: മാവേലിക്കര മണ്ഡലത്തിലെ എൻ.ഡി.എ സ്ഥാനാർത്ഥി തഴവ സഹദേവൻ നാമനിർദ്ദേശ പത്രിക സമർപ്പിച്ചു. ഇന്നലെ ഉച്ചയ്ക്ക് 12 മണിയോടെ മാവേലിക്കര മണ്ഡലത്തിലെ ഉപവരണാധികാരി ചെങ്ങന്നൂർ ആർ.ഡി.ഒ അലക്സ് ജോസഫ് മുമ്പാകെയാണ് പത്രിക നൽകിയത്. നൂറുകണക്കിന് പ്രവർത്തകരുടെ അകമ്പടിയോടെ ബി.ജെ.പി ചെങ്ങന്നൂർ നിയോജക മണ്ഡലം കമ്മിറ്റി ഓഫീസിൽ നിന്ന് പ്രകടനമായാണ് സ്ഥാനാർത്ഥിയും നേതാക്കളുമെത്തിയത്. എൻ.ഡി.എ പാർലമെന്റ് മണ്ഡലം ചെയർമാൻ കെ.ജി. രാജ്‌മോഹൻ, ബി.ഡി.ജെ.എസ് ജില്ലാ പ്രസിഡന്റ് ഷാജി എം. പണിക്കർ, കേരള കോൺഗ്രസ് സംസ്ഥാന ജനറൽ സെക്രട്ടറി രാജൻ കണ്ണാട്ട്, ബി.ജെ.പി സംസ്ഥാന സമിതി അംഗം ടി.ഒ. നൗഷാദ് എന്നിവരും സ്ഥാനാർത്ഥിക്കൊപ്പം ഉണ്ടായിരുന്നു
രാവിലെ 11ന് പാർട്ടി ഓഫീസിൽ നിന്നാരംഭിച്ച പ്രകടനത്തിന് ബി.ജെ.പി ദക്ഷിണമേഖലാ പ്രസിഡന്റ് വെള്ളിയാകുളം പരമേശ്വരൻ, ജില്ലാ ജനറൽ സെക്രട്ടറി എം.വി. ഗോപകുമാർ, സെക്രട്ടറി ജി. ജയദേവ്, ട്രഷറർ കെ.ജി. കർത്ത, ബി.ഡി.ജെ.എസ് ജില്ലാ സെക്രട്ടറിമാരായ മോഹനൻ കൊഴുവല്ലൂർ, രമേശ് ബാബു, ജില്ലാ വൈസ് പ്രസിഡന്റ് പ്രകാശ് നമ്പൂതിരി, കാമരാജ് കോൺഗ്രസ് ജില്ലാ സെക്രട്ടറി സുരേഷ് ബുധനൂർ, യുവമോർച്ച ജില്ലാ പ്രസിഡന്റ് പ്രമോദ് കാരക്കാട്, മഹിളാമോർച്ച ജില്ലാ സെക്രട്ടറി സുജാപിള്ള, ബി.ഡി.എം.എസ് ജില്ലാ സെക്രട്ടറി സുശീല, ബി.ജെ.പി നിയോജക മണ്ഡലം പ്രസിഡന്റ് സജു ഇടക്കല്ലിൽ, ബി.ഡി.ജെ.എസ് നിയോജക മണ്ഡലം പ്രസിഡന്റ് സുരേഷ് ചിത്രമാലിക, ബ്ലോക്ക് പഞ്ചായത്ത് അംഗം കലാരമേശ് എന്നിവർ നേതൃത്വം നൽകി.