കുന്നത്തൂർ: ഹിന്ദു ഭൂരിപക്ഷ മേഖലകളിൽ നിന്ന് രാഹുൽ ഗാന്ധി ഒളിച്ചോടുകയാണന്ന പ്രസ്താവന നടത്തിയ പ്രധാനമന്ത്രി നരേന്ദ്ര മോദി ഇന്ത്യയിലെ പാർലമെന്റ് മണ്ഡലങ്ങളെപ്പോലും വർഗീയമായി വേർതിരിക്കുകയാണന്ന് എ.ഐ.സി.സി സെക്രട്ടറി പി.സി. വിഷ്ണുനാഥ് പറഞ്ഞു. യു.ഡി.എഫ് മൈനാഗപ്പള്ളി പടിഞ്ഞാറ് മണ്ഡലം തിരഞ്ഞെടുപ്പ് കൺവെൻഷൻ ഉദ്ഘാടനം ചെയ്യുകയായിരുന്നു അദ്ദേഹം. വർഗീയ ഫാസിസ്റ്റ് ശക്തികൾ വീണ്ടും അധികാരത്തിൽ വന്നാൽ ഇത് അവസാനത്തെ തിരഞ്ഞെടുപ്പാകുമെന്നതിനാൽ രാജ്യത്തെ നിലനിറുത്തുന്നതിനാണ് കോൺഗ്രസ് മത്സരിക്കുന്നത്. എന്നാൽ സി.പി.എം മത്സരിക്കുന്നത് ദേശീയ പാർട്ടി എന്ന സ്ഥാനം നിലനിറുത്താനാണ്. അല്ലങ്കിൽ സി.പി.എമ്മിന് വരുന്ന തിരഞ്ഞെടുപ്പുകളിൽ കുടം, ടോർച്ച് പോലുള്ള ചിഹ്നങ്ങളിൽ മത്സരിക്കേണ്ടി വരുമെന്നും വിഷ്ണുനാഥ് പറഞ്ഞു. പ്രകാശ് മൈനാഗപ്പള്ളി അദ്ധ്യക്ഷത വഹിച്ചു. പി. രാജേന്ദ്രപ്രസാദ്, റാം മോഹൻ, വൈ.എ. സമദ്, തുണ്ടിൽ നൗഷാദ്, മുസ്തഫ, സുധീർ ജേക്കബ്, ബിജു മൈനാഗപ്പള്ളി, ഗോകുലം അനിൽ, എ. നൗഷാദ്, കല്ലട ഗിരീഷ്, ഉല്ലാസ് കോവൂർ, തോമസ് വൈദ്യൻ, രഘുകുമാർ, സിജു കോശി വൈദ്യൻ എന്നിവർ സംസാരിച്ചു.