ചിറയിൻകീഴ്: പ്രധാനപ്പെട്ട ജംഗ്ഷനുകളിൽ ഒന്നായ മുരുക്കുംപുഴയിൽ കാത്തിരിപ്പ് കേന്ദ്രം ഇല്ലാത്തത് യാത്രക്കാരെ വലയ്ക്കുന്നു. നാലു റോഡുകൾ സന്ധിക്കുന്ന ഇവിടെ ദിനം പ്രതി നൂറുക്കണക്കിന് ആളുകളാണ് വാഹന യാത്രയ്ക്കായി എത്തുന്നത്. ചിറയിൻകീഴ് റോഡിലും മംഗലപുരം റോഡിലും കണിയാപുരം റോഡിലും ഇവിടെ കാത്തുനിൽക്കുന്നവർക്ക് മഴ പെയ്താൽ സമീപത്തെ കടത്തിണ്ണകളാണ് ആശ്രയം. മഴക്കാലമായാൽ അപ്പാടെ നനഞ്ഞ് കുതിർന്നാണ് ഇവിടത്തെ യാത്രക്കാരിൽ അധികം പേരും വാഹനത്തിൽ കയറുന്നത്. വയസായവരുടെയും സ്ത്രീകളുടെയും കുട്ടികളുടെയും കാര്യമാണ് ഏറെ കഷ്ടം. വാഹനങ്ങൾക്ക് വേണ്ടി കാത്തുനിന്ന് കാൽ കഴയ്ക്കുമ്പോൾ അല്പം ആശ്വാസത്തിന് വേണ്ടി ഇരിക്കാനൊരിടം ഇല്ലാതെ ഇവർ വലയുകയാണ്.

മംഗലപുരം ഗ്രാമപഞ്ചായത്തിലെ പ്രധാന ജംഗ്ഷനുകളിൽ ഒന്നാണിത്. പോരാത്തതിന് മുരുക്കുംപുഴ റെയിൽവേ സ്റ്റേഷനിൽ വന്നിറങ്ങുന്ന തോന്നയ്ക്കൽ ആശാൻ സ്മാരകം, സായി ഗ്രാമം, ടെക്നോസിറ്റി, കിൻഫ്ര പാർക്ക് എന്നിവിടങ്ങളിൽ പോകേണ്ട യാത്രക്കാർ ആശ്രയിക്കുന്ന ബസ് സ്റ്റോപ്പാണിത്. തീരദേശ മേഖലയായ മുരുക്കുംപുഴയെയും മലയോര മേഖലയായ നെടുമങ്ങാടിനെയും ബന്ധിപ്പിച്ച് കൊണ്ട് ധാരാളം കെ.എസ്.ആർ.ടി.സി സർവീസുകളും ഇവിടെ നിന്നുണ്ട്. ചെറിയ ജംഗ്ഷനുകളിൽപ്പോലും വെയിറ്റിംഗ് ഷെഡ് നിർമിക്കുന്ന ഇക്കാലത്ത് ഇത്രയേറെ പ്രാധാന്യമുളള മുരുക്കുംപുഴയിൽ വെയിറ്റിംഗ് ഷെഡ് ഇല്ലാത്തത് യാത്രക്കാരോടുളള അധികൃതരുടെ അവഗണനാ മനോഭാവമാണെന്നാണ് നല്ലൊരു ശതമാനം യാത്രക്കാർ പറയുന്നത്. വെയിറ്റിംഗ് ഷെഡ് നിർമിക്കുന്നതിനുളള സ്ഥല പരിമിതിയാണ് തടസ്സമെന്ന് അധികൃതർ പറയുമ്പോഴും അനുയോജ്യമായ സ്ഥലം വേണമെങ്കിൽ കണ്ടുപിടിക്കാമെന്നാണ് മറുവാദം.