വിതുര: വിതുര,തൊളിക്കോട് പഞ്ചായത്തുകളിൽ വൈദ്യുതി മുടക്കം പതിവാകുന്നു.മുന്നറിയിപ്പില്ലാതെയുള്ള പവർകട്ട് നാട്ടുകാരെ ദുരിതത്തിലാഴ്ത്തുന്നു. ഇടവിട്ട് മണിക്കൂറുകളോളം വൈദ്യുതി വിതരണം മുടങ്ങുന്നത് പതിവാകുകയാണ്.പകൽ സമയത്തെ വൈദ്യുതി മുടക്കവും കത്തുന്ന വെയിലും നാട്ടുകാരെ വലയ്ക്കുകയാണ്. ഒരാഴ്ചയായി ഇൗ പ്രതിഭാസം തുടരുന്നെന്നാണ് നാട്ടുകാർ പറയുന്ന പരാതി. കടുത്ത ചൂട് മൂലം നട്ടം തിരിയുന്ന ജനത്തിന് വൈദ്യുതി കൂടി ലഭിക്കാതെ വന്നതോടെ പലരും പരാതിയുമായി രംഗത്തെത്തി. നിലവിൽചൂടിൻെറ കാഠിന്യം മൂലം വൈദ്യുതി ഉപഭോഗം വർദ്ധിച്ചിട്ടുണ്ട്.വൈദ്യുതിക്ക് നിയന്ത്രണം ഏർപ്പെടുത്തില്ലെന്ന് മന്ത്രിയും വകുപ്പ് മേധാവികളും പ്രഖ്യാപിക്കുന്നുണ്ടെങ്കിലും മറിച്ചാണ് സംഭവിക്കുന്നത്. വൈദ്യുതി ഒാഫീസുകളിൽ പരാതികളുടെ പ്രളയമാണ്.തൊളിക്കോട് പഞ്ചായത്തിലാണ് വിതുരയെ അപേക്ഷിച്ച് വൈദ്യുതി പ്രതിസന്ധി രൂക്ഷമായിരിക്കുന്നത്. വൈദ്യുതി പ്രയാസം ഇങ്ങനെ

1. ഇലക്ട്രിക് ഉപകരണങ്ങൾ കേടാകുന്നു

വൈദ്യുതിവിതരണത്തിലെ വ്യതിയാനം ഇലക്ട്രിക് ഉപകരണങ്ങൾ കേടാകുന്നതിന് കാരണമാകുന്നു. അടിക്കടി വൈദ്യുതി വന്നുപോകുന്നത് മൂലം ഫ്രിഡ്ജ്,ഫാൻ,ടി.വി.ലാപ്ടോപ്പ്,കംപ്യൂട്ടർ എന്നിവയാണ് വിതരണത്തിലെ ഏറ്റക്കുറച്ചിലും തടസവും മൂലം ഇവയുടെ പ്രവർത്തനത്തെ സാരമായി ബാധിക്കുന്നു.

2. കുടിവെള്ളവിതരണവും തഥൈവ

വൈദ്യുതി പ്രതിസന്ധി രൂക്ഷമായതോടെ കുടിവെള്ള വിതരണവും തടസപ്പെട്ടു.വൈദ്യുതി വിതരണത്തിലെ വ്യതിയാനം പമ്പ് ഹൗസുകളെ പ്രതികൂലമായി ബാധിച്ചിട്ടുണ്ട്.കൃത്യമായും സമയക്രമം പാലിച്ചും പമ്പിംഗും നടത്താനും കഴിയുന്നില്ല. ഫലത്തിൽ വെള്ളവും,വെളിച്ചവും മുടങ്ങുന്ന അവസ്ഥ.

3. വൈദ്യുതിഉത്പാദനം ഉഷാർ

വിതുര പഞ്ചായത്തിലെ പേപ്പാറ ഡാമിൽ വൈദ്യുതി ഉത്പാദനം തകൃതിയായി നടക്കുമ്പോഴാണ് വെളിച്ചത്തിനായി നാട്ടുകാരുടെ നെട്ടോട്ടം. പ്രതിദിനം മൂന്ന് മെഗാവാട്ട് വൈദ്യുതിയാണ് പേപ്പാറ ഡാമിൽ നിന്നും ഉത്പാദിപ്പിക്കുന്നത്. നേരത്തേ ശക്തമായ മഴയെ തുടർന്ന് ഡാമിലെ ജലനിരപ്പ് ഉയരുകയും ഷട്ടറുകൾ തുറന്നുവിടുകയും ചെയ്തിരുന്നു.ഫലത്തിൽ പഞ്ചായത്തിൽ വൈദ്യുതി ഉത്പാദനം തകൃതിയാകുമ്പോൾ നാട്ടുകാർ സമരം നടത്തേണ്ട അവസ്ഥയാണ്

4. കച്ചവടക്കാരും പ്രതിസന്ധിയിൽ

വൈദ്യുതി പ്രതിസന്ധി രൂക്ഷമായതോടെ വ്യാപാരി സമൂഹവും പ്രതിസന്ധിയിലാണ്.ഫ്രിഡ്ജിലും,ഫ്രീസറിലും മറ്റും സൂക്ഷിച്ചിരിക്കുന്ന പാലും,എെസ്ക്രീമും മറ്റും കേടാകുകയും വൻ നഷ്ടം ഉണ്ടാകുകയും ചെയ്യുന്നതായി വ്യാപാരികൾ പറയുന്നു.തള്ളച്ചിറ മേഖലയിൽ രൂക്ഷമായ വോൾട്ടേജ് ക്ഷാമവും നേരിടുന്നുണ്ട്.

5. പ്രതിസന്ധി പരിഹരിക്കണം

വിതു,തൊളിക്കോട് പഞ്ചായത്തുകളിലനുഭവപ്പെടുന്ന രൂക്ഷമായ വൈദ്യുതി പ്രതിസന്ധിക്ക് അടിയന്തര പരിഹാരം കാണണമെന്ന് കേരള വ്യാപാരിവ്യവസായി ഏകോപനസമിതി വിതുര യൂണിറ്റ് കമ്മിറ്റിയോഗം ആവശ്യപ്പെട്ടു.നടപടികൾ സ്വീകരിച്ചില്ലെങ്കിൽ ശക്തമായ സമരപരിപാടികൾ സംഘടിപ്പിക്കുമെന്ന് ഭാരവാഹികൾ അറിയിച്ചു.