തിരുവനന്തപുരം : കിഫ്ബിയുടെ മസാല ബോണ്ട് സംബന്ധിച്ച ഫയലുകൾ പ്രതിപക്ഷ എം.എൽ.എമാരുടെ സംഘത്തെ കാണിക്കണമെന്നാവശ്യപ്പെട്ട് മുഖ്യമന്ത്രി പിണറായി വിജയന് പ്രതിപക്ഷ നേതാവ് രമേശ് ചെന്നിത്തലയുടെ തുറന്ന കത്ത്. സംസ്ഥാന വികസനത്തിന് വിഭവ സമാഹരണം നടത്തുന്നതിനോട് യു.ഡി.എഫിന് യോജിപ്പുണ്ട്. പക്ഷേ അത് സുതാര്യമായും സംസ്ഥാന താത്പര്യം സംരക്ഷിച്ചുമാകണം. പക്ഷേ മസാല ബോണ്ടിന്റെ ഇടപാടിന്മേൽ അടിമുടി ദുരൂഹതയുണ്ട്. കേരളത്തിന് തലമുറകളോളം സാമ്പത്തിക ബാദ്ധ്യതയുണ്ടാക്കുന്ന ഇടപാട് സംബന്ധിച്ച ഫയലുകൾ പ്രതിപക്ഷ എം.എൽ.എമാരുടെ സംഘത്തെ കാണിക്കണമെന്നാവശ്യപ്പെട്ടിട്ടും മുഖ്യമന്ത്രി പ്രതികരിച്ചില്ല. ഇത് സംബന്ധിച്ച വിവരങ്ങൾ പുറത്തു വന്നത് മുതൽ മന്ത്രി തോമസ് ഐസക്കും കിഫ്ബിയും ഒന്നിന് പിറകെ ഒന്നായി അസത്യങ്ങൾ പറഞ്ഞ് യഥാർത്ഥ വസ്‌തുതകൾ മറച്ച് വയ്‌ക്കാൻ കാണിക്കുന്ന വെപ്രാളം ഇത് സംബന്ധിച്ച സംശയങ്ങളെ ബലപ്പെടുത്തുകയാണെന്നും ചെന്നിത്തല കത്തിൽ ചൂണ്ടിക്കാട്ടി. മസാല ബോണ്ട് സംബന്ധിച്ച ആറുചോദ്യങ്ങളും കത്തിലുണ്ട്.