തിരുവനന്തപുരം: ശ്രീനാരായണ ധർമ്മസംഘം ട്രസ്റ്റ് സംഘടിപ്പിക്കുന്ന ചെമ്പഴന്തി ശ്രീനാരായണ ഗുരുകുല കൺവെൻഷൻ 30 മുതൽ മേയ് 2 വരെ നടക്കും. 30ന് രാവിലെ 7.30ന് ഗുരുകുലം സെക്രട്ടറി സ്വാമി ശുഭാംഗാനന്ദ പതാക ഉയർത്തും. 9.30ന് പ്രശസ്ത സാഹിത്യകാരനും കേരള സാഹിത്യ അക്കാഡമി മുൻ ചെയർമാനുമായ പെരുമ്പടവം ശ്രീധരൻ കൺവെൻഷൻ ഉദ്ഘാടനം ചെയ്യും. ശിവഗിരിമഠം ജനറൽ സെക്രട്ടറി സ്വാമി സാന്ദ്രാനന്ദ അദ്ധ്യക്ഷത വഹിക്കും. ശിവഗിരിമഠത്തിലെ സ്വാമി സൂഷ്മാനന്ദ അനുഗ്രഹ പ്രഭാഷണവും ഡോ.എം.എ. സിദ്ദിഖ് മുഖ്യപ്രഭാഷണവും നടത്തും. നഗരസഭാ കൗൺസിലർ കെ.എസ്. ഷീല, ഷൈജു പവിത്രൻ തുടങ്ങിയവർ സംസാരിക്കും.

ഉച്ചയ്ക്ക് 1 മുതൽ ഗുരുപൂജ, 2ന് 'ഗുരുപാദദശകം' എന്ന വിഷയത്തിൽ സോഫി വാമദേവൻ നയിക്കുന്ന പഠനക്ലാസ്, 4ന് ഗുരുദർശനത്തിന്റെ സാമൂഹികമാനത്തെപ്പറ്റി ലാൽ വാഴൂരിന്റെ പ്രഭാഷണം. മേയ് 1ന് രാവിലെ 9ന് എറണാകുളം വൺ വേൾഡ് സ്കൂൾ ഒഫ് വേദാന്തയിലെ സ്വാമിനി നിത്യചിന്മയി നയിക്കുന്ന അദ്വൈതദീപിക, 11ന് സ്വാമി മുക്താനന്ദയതി നയിക്കുന്ന ഭക്തിദർശനം എന്നീ ക്ലാസുകൾ നടക്കും. ഉച്ചയ്ക്ക് 1ന് ഗുരുപൂജ, 2ന് 'മതവിശ്വാസം, ദൈവവിശ്വാസം, ആത്മവിശ്വാസം' എന്ന വിഷയത്തിൽ നടക്കുന്ന ചർച്ച മന്ത്രി കടകംപള്ളി സുരേന്ദ്രൻ ഉദ്ഘാടനം ചെയ്യും. ശ്രീനാരായണ അന്തർദേശീയ പഠനകേന്ദ്രം ഡയറക്ടർ ഡോ. എം. ആർ. യശോധരൻ മോഡറേറ്ററാകും. മുഖ്യമന്ത്രിയുടെ ശാസ്ത്ര ഉപദേഷ്ടാവ് എം.ചന്ദ്രദത്തൻ, വിജിലൻസ് പൊലീസ് സൂപ്രണ്ട് കെ.ഇ.ബൈജു, പ്രശസ്ത സൈക്യാട്രിസ്റ്റ് ഡോ.അരുൺ ബി. നായർ എന്നിവർ പങ്കെടുക്കും.

മേയ് 2ന് രാവിലെ 9 മുതൽ സ്വാമി ബോധി തീർത്ഥയുടെ 'ജനനീനവരത്നമഞ്ജരി' പഠനക്ലാസ്, 10.30 മുതൽ 'ആത്മസുഖവും അപരന്റെ സുഖവും' സെമിനാറിൽ ഡോ.ജോർജ് ഓണക്കൂർ മോഡറേറ്ററാകും. സി.പി. ഉദയഭാനു വിഷയാവതരണം നടത്തും. ഗവ.കണ്ണാശുപത്രി ആർ.എം.ഒ ഡോ. ചിത്ര രാഘവൻ, പി.കെ. തങ്കപ്പൻ അടിമാലി എന്നിവർ പങ്കെടുക്കും. ഉച്ചയ്ക്ക് 1ന് ഗുരുപൂജ, 2ന് സ്വാമി അനപേക്ഷാനന്ദ നയിക്കുന്ന 'ആത്മോപദേശശതകം' പഠനക്ലാസ്, 4ന് നടക്കുന്ന കൺവെൻഷൻ അവലോകനത്തിലും സമാപന സമ്മേളനത്തിലും ഗുരുകുലം സെക്രട്ടറി സ്വാമി ശുഭാംഗാനന്ദ അദ്ധ്യക്ഷത വഹിക്കും. നഗരസഭാ വിദ്യാഭ്യാസ സ്റ്രാൻഡിംഗ് കമ്മിറ്റി ചെയർമാൻ സി. സുദർശനൻ, ശ്രീനാരായണ വൈദികസംഘം ജനറൽ സെക്രട്ടറി അരുവിപ്പുറം അശോകൻ ശാന്തി, അനിൽ തൃപ്പൂണിത്തുറ, സുഭാഷ് ഭാസ്കർ എന്നിവർ പങ്കെടുക്കും. തുടർന്ന് സമൂഹപ്രാർത്ഥനയോടെ കൺവെൻഷൻ സമാപിക്കും. പങ്കെടുക്കുന്നവർക്ക് താമസത്തിനും ഭക്ഷണത്തിനുമുള്ള സൗകര്യം ഗുരുകുലത്തിൽ ഒരുക്കിയിട്ടുണ്ടെന്ന് സ്വാമി ശുഭാംഗാനന്ദ അറിയിച്ചു. കൂടുതൽ വിവരങ്ങൾക്ക് ഫോൺ: 0471 2595121, 2592721