അരൂർ: തിരക്കേറിയ റോഡിനു സമീപം വള്ളിച്ചെടികൾ പടർന്നു കയറിയ വൈദ്യുതി​ പോസ്റ്റ് അപകട ഭീതി ഉയർത്തുന്നു. അരൂർ പഞ്ചായത്തിലെ കോട്ടപ്പുറം റോഡിലാണ് പോസ്റ്റ് ഭീഷണി​യാവുന്നത്.

റോഡിൽ നിന്ന് പടർന്ന് കയറിയ വള്ളിപ്പടർപ്പുകൾ വൈദ്യുതി ലൈനിൽ നിന്ന് താഴേക്കു തൂങ്ങി നിൽക്കുന്ന നിലയിലാണ്. മഴ സമയത്ത് വള്ളിപ്പടർപ്പിൽ നിന്ന് കാൽനടയാത്രികർക്ക് ചെറി​യ തോതി​ൽ വൈദ്യുതാഘാതമേറ്റി​ട്ടുണ്ട്. രാത്രിയിൽ പോസ്റ്റി​ലെ വഴിവിളക്ക് തെളിഞ്ഞാലും വള്ളിച്ചെടികൾ പൊതിഞ്ഞിരിക്കുന്നതിനാൽ പരിസരത്ത് വെളിച്ചം ലഭിക്കാറില്ല.

വീതി കുറഞ്ഞതും എന്നാൽ ഏറെ തിരക്കുള്ളതുമായ കോട്ടപ്പുറം റോഡിലൂടെ വലിയ വാഹനങ്ങൾ വരുമ്പോൾ കുട്ടികളും പ്രായമുള്ളവരും അരി​കി​ലേക്ക് നീങ്ങി നി​ൽക്കുന്നതിനിടെ ഈ പോസ്റ്റിൽ കൈ വെക്കാറുണ്ട്. ഇത് അപകടം ഉണ്ടാക്കുമോയെന്ന ആശങ്കയിലാണ് നാട്ടുകാർ. പല തവണ അരൂർ ഇലക്ട്രിക്കൽ സെക്ഷൻ അധികൃതരെ അറിയിച്ചെങ്കിലും നടപടിയൊന്നും ഉണ്ടായി​ട്ടി​ല്ല.