ഇടുക്കി: ആരോഗ്യ രക്ഷയ്ക്ക് മാലിന്യ മുക്ത പരിസരം എന്ന സന്ദേശത്തോടെ നടപ്പാക്കുന്ന പെൻസിൽപദ്ധതിയുടെ നെടുങ്കണ്ടം ബ്ലോക്ക്തല പരിശീലനം സമാപിച്ചു. സമാപന സമ്മേളനം രാജകുമാരി പഞ്ചായത്ത് വികസന കാര്യ സ്റ്റാൻഡിംഗ് കമ്മിറ്റി ചെയർമാൻ പി.പി. ജോയ് ഉദ്ഘാടനം ചെയ്തു. ഹരിത കേരളം മിഷൻ, കുടുംബശ്രീ മിഷൻ, ശുചിത്വ മിഷൻ, ആരോഗ്യ വകുപ്പ്, കില, തദ്ദേശസ്വയംഭരണ സ്ഥാപനങ്ങൾ എന്നിവയുടെ സംയുക്താഭിമുഖ്യത്തിലാണ് അവധിക്കാല ക്യാമ്പ് പഞ്ചായത്തുതലത്തിൽ സംഘടിപ്പിക്കുന്നത്. നെടുങ്കണ്ടം ബ്ലോക്കിലെ ആദ്യഘട്ട പരിശീലന പരിപാടി നെടുങ്കണ്ടം കമ്യൂണിറ്റി ഹാളിലും രണ്ടാം ഘട്ടം രാജകുമാരി പഞ്ചായത്ത് ഹാളിലുമാണ് സംഘടിപ്പിച്ചത്. രണ്ടാം ഘട്ട പരിശീലന പരിപാടിയിൽ രാജകുമാരി, രാജക്കാട്, സേനാപതി പഞ്ചായത്തിലെ വിവിധ വാർഡുകളിലെ കുടുംബശ്രീ പ്രതിനിധികൾക്ക് പരിശീലനം നൽകി. ഹരിതമിഷൻ അസിസ്റ്റന്റ് കോഓർഡിനേറ്റർ പി.എസ് വിനയൻ, കുടുംബശ്രീ ജില്ലാ മിഷൻ നെടുങ്കണ്ടം ബ്ലോക്ക് കോഓർഡിനേറ്റർ അഞ്ജു മോൾ വി.എസ് എന്നിവർ പരിശീലന പരിപാടിക്ക് നേതൃത്വം നൽകി. കുടുംബശ്രീ ജില്ലാ റിസോഴ്‌സ് പേഴ്‌സൺ ആശ സന്തോഷ്, ആൻസി മാത്യു, അനില പ്രദീപ് എന്നിവർ ക്ലാസുകൾ നയിച്ചു.