കോഴിക്കോട്: കോഴിക്കോട് സിറ്റി പരിധിയിൽ വർദ്ധിച്ചുവരുന്ന വാഹനാപകടങ്ങൾ ഒഴിവാക്കാനായി സിറ്റി പൊലീസ് സ്പെഷ്യൽ ഡ്രൈവ് ആരംഭിക്കുന്നു. സിറ്റി പൊലീസ് കമ്മീഷണർ എ.വി ജോർജിന്റെ നിർദ്ദേശപ്രകാരം നടപ്പാക്കുന്ന പദ്ധതി ഇന്ന് ആരംഭിക്കും.

ട്രാഫിക്ക് നിയമം ലംഘിക്കുന്ന വാഹനങ്ങൾക്കെതിരെ കർശനമായ നടപടി സ്വീകരിക്കും. ഓരോ ദിവസവും പ്രത്യേക സമയം നിശ്ചയിച്ച് സിറ്റി പൊലീസിന് കീഴിലെ ഭൂരിഭാഗം ഉദ്യോഗസ്ഥരും സ്പെഷ്യൽ ഡ്രൈവിൽ പങ്കെടുക്കും.

അമിത വേഗത , ട്രിപ്പിൾ ഡ്രൈവിംഗ്, മദ്യപിച്ച് വാഹനം ഓടിക്കൽ, സീബ്രാ ലൈനിൽ അലക്ഷ്യമായും അശ്രദ്ധമായും വാഹനം ഓടിക്കൽ, ഇടതു വശത്ത് കൂടിയുള്ല ഓവർ ടേക്കിംഗ്, മൊബൈൽ ഫോൺ ഉപയോഗിച്ച് വാഹനം ഓടിക്കൽ, ബസുകൾ സ്റ്റോപ്പിൽ നിറുത്താതിരിക്കൽ, ഹെൽമറ്റ് ധരിക്കാതെ ഇരുകചക്ര വാഹനം ഓടിക്കൽ, ഫാൻസി നമ്പർ പ്ലേറ്റുകൾ, സൺഫിലീം ഉപയോഗിക്കുക തുടങ്ങിയ കാര്യങ്ങളിൽ കൂടുതൽ ശ്രദ്ധ കേന്ദ്രീകരിക്കും.

ട്രാഫിക് നിയമ ലംഘനം ശ്രദ്ധയിൽ പെട്ടാൽ വാഹനങ്ങൾ പിടിച്ചെടുക്കുമെന്ന് സിറ്റി പൊലീസ് അറിയിച്ചു. കൂടാതെ ഇത്തരത്തിലുള്ള ട്രാഫിക് നിയമലംഘനം പൊതുജനങ്ങളുടെ ശ്രദ്ധയിൽ പെട്ടാൽ 1090 എന്ന നമ്പറിലോ 6238488686 എന്ന വാട്സ് അപ്പ് നമ്പറിലോ അറിയിക്കാം. പൊതുജനങ്ങൾ നിയമം പാലിച്ച് പൊലീസുമായി സഹകരിക്കണമെന്ന് പൊലീസ് അറിയിച്ചു.

@ മഫ്ടി പൊലീസ് രംഗത്ത്

കോഴിക്കോട് സിറ്റിയിലെ ട്രാഫിക്ക് നിയമലംഘനം പിടികൂടാൻ മഫ്ടി പൊലീസിനെ രംഗത്തിറക്കും. നഗരത്തിലെ പ്രധാന പ്രദേശങ്ങളിലെല്ലാം മഫ്ടി പൊലീസിനെ നയമിച്ചിട്ടുണ്ട്.