വെള്ളമുണ്ട: റോഡിന്റെ വീതി കൂട്ടി നവീകരിച്ചപ്പോൾ ഇലക്ട്രിക് പോസ്റ്റ് റോഡിന് നടുവിലായി. വെള്ളമുണ്ട ടൗണിലാണ് വിചിത്രമായ രീതിയിൽ റോഡ് ടാറിംഗ് നടത്തിയിരിക്കുന്നത്.തരുവണ മുതൽ കാഞ്ഞിരങ്ങാട് വരെ 9 മീറ്റർ വീതിയിൽ ടാറിംഗ് നടത്തുന്നതിന്റെ ഭാഗമായിട്ടാണ് വെള്ളമുണ്ട ടൗണിലും കൾവർട്ടുകളുടെയും സ്ലാബുകളുടെയും പ്രവൃത്തികൾ പൂർത്തിയാക്കി കഴിഞ്ഞ ദിവസം റോഡ് ടാർ ചെയ്തത്. ഒന്നര മീറ്ററോളം റോഡിലേക്ക് കയറി നിൽക്കുന്ന പോസ്റ്റ് മാറ്റാത്തതിനെ കുറിച്ചന്വേഷിച്ചപ്പോൾ എസ്റ്റിമേറ്റിൽ പോസ്റ്റ് മാറ്റുന്നതിന് ഫണ്ട് വകയിരുത്തിയില്ലെന്നതാണ് മറുപടി.ടൗണിലെ നിരവധി സ്ഥാപനങ്ങളിലേക്ക് വൈദ്യുതി നൽകുന്നതും എച്ച് ഡി ലൈൻ കടന്നു പോവുന്നതുമാണ് ഈ പോസ്റ്റ്.ടൗണിലെ ഓട്ടോസ്റ്റാന്റായ റോഡിന്റെ ഈ ഭാഗത്ത് നിന്നും രാത്രിയോടെ വാഹനങ്ങളൊഴിയുമ്പോൾ റോഡിന് നടുവിലെ ഇലക്ട്രിക് പോസ്റ്റ് അപകടം വരുത്തിവെക്കും.