മക്കിയാട്: റോം ആസ്ഥാനമായിട്ടുള്ള സിൽവസ്ട്രോ ബെനഡിക്ടിൻ കോൺഗ്രിഗേഷന്റെ ആബട്ട് ജനറൽ ആയി ഡോ.ആന്റണി പുത്തൻപുരക്കൽ തിരഞ്ഞെടുക്കപ്പെട്ടു. ഇന്നലെ റോമിൽ നടന്ന ചടങ്ങി​ലാണ് കഴിഞ്ഞ 6 വർഷമായി മക്കിയാട് ബെനഡിക്ടിൻ ആശ്രമത്തിനെ പ്രതിനിധാനം ചെയ്ത് ജനറൽ കൗൺസിലറായി സേവനമനുഷ്ടിച്ച് വരികയായിരുന്ന റവ.ഫാദർ ആന്റണിയെ ആബർട്ട് ജനറൽ ആയി തി​രഞ്ഞെടുത്തത്.ഈ സ്ഥാനത്തേക്ക് ഏഷ്യയിൽ നിന്നും ആദ്യമായി തി​രഞ്ഞെടുക്കപ്പെട്ട വ്യക്തി എന്ന ബഹുമതിയും ഫാ.ആന്റണി പുത്തൻപുരയ്ക്ക് ആണ്.

മക്കിയാട് ബെനഡിക്ടിൻ ആശ്രമത്തിൽ ചേർന്ന ആന്റണി നിയമ പഠനം പൂർത്തിയാക്കി എറണാകുളം ഹൈക്കോടതിയിൽ അഡ്വക്കറ്റായി. പാവപ്പെട്ടവർക്ക് വേണ്ടി നിയമ രംഗത്തും സേവനമനുഷ്ടിച്ചിട്ടുണ്ട്.മക്കിയാട് ഹോളി ഫെയിസ് ഹൈസ്‌കൂൾ പ്രിൻസിപ്പലായി സേവനം ചെയ്തു വരുമ്പോഴായിരുന്നു ജനറൾ കൗൺസിലറായി റോമിലേക്ക് പോയത്.

വെള്ളമുണ്ട ഒഴുക്കൻമൂലയിലെ പരേതരായ പുത്തൻപുരക്കൽ ജോസഫിന്റെയും മറിയത്തിന്റെയും ഏഴ് ആൺമക്കളിൽ ആറാമനാണ് ചാക്കോ എന്ന ഫാ. ആന്റണി.
കെ.എസ്.ഇ ബി.മാനന്തവാടി സെക്ഷൻ ഓഫീസിൽ നിന്നു വിരമിച്ച എ.ഇ.മാരായ പി.ജെ.ആന്റണി, ഒഴുക്കൻമൂലയിലെ പി.ജെ. വിൻസന്റ് എന്നിവർ സഹോദരന്മാരാണ്.