രാമനാട്ടുകര:​ രാസവസ്തുക്കൾ വിതറി പഴുപ്പിച്ച മാമ്പഴങ്ങളെ കടക്കു പുറത്ത് എന്ന് വിളംബരം ചെയ്ത് തികച്ചും ജൈവ നാടൻ രീതിയിൽ പഴുപ്പിച്ച മാമ്പഴങ്ങളുമായി രാമനാട്ടുകരയിൽ ​ മാമ്പഴമേള​ക്കും ​ചക്ക മഹോത്സവ​ത്തിനും തുടക്കമായി .​​ മലബാർ മാവ് കർഷക സമിതിയുടെയും ഓൾ കേരള ജാക്ക് ഫ്രൂട്ട് പ്രമോഷൻ അസോസിയേഷന്റെയും സംയുക്താഭിമുഖ്യത്തിൽ രാമനാട്ടുകര ബസ് സ്റ്റാന്റിന് സമീപം അഡ്രസ്സ് ഗ്രൗണ്ടി​ലാണ് ​ മാമ്പഴമേളയും ചക്ക മഹോത്സവവും ആരംഭിച്ച​ത് ​. രാമനാട്ടുകര നഗരസഭ ചെയർമാൻ വാഴയിൽ ബാലകൃഷ്ണൻ ഉദ്ഘാടനം ചെയ്തു. ഉപാ​ദ്ധ്യ​ക്ഷ പി.കെ. സജ്ന അദ്ധ്യക്ഷത വഹിച്ചു. സ്ഥിരം സമിതി അദ്ധ്യക്ഷന്മാരായ മണ്ണൊടി രാംദാസ് , ​ബീനപ്രഭ ​, കൗൺസിലർമാർ, വിവിധ രാഷ്​ട്രീയ ​ കക്ഷി പ്രതിനിധികൾ, സാംസ്കാരിക പ്രവർത്തകർ എന്നിവർ സംസാരിച്ചു. എ​.​ബി.ഫ്രാൻസിസ് സ്വാഗതവും നജീബ് മണ്ണാർക്കാട് നന്ദിയും പറഞ്ഞു. കുറ്റ്യാട്ടൂർ (നമ്പ്യാർ ) മുവാണ്ടൻ, പിയൂർ, സിന്ദൂരം, സോന്താ പുരി, നീലം, കാലാപ്പാടി, മൽഗോവ, ചൈലി, നാട്ടിചേല, ഹുദാദത്ത്, ബങ്കനപ്പള്ളി, ഹിമാപസന്ത്, ചന്ദ്രക്കാരൻ, കിളിച്ചുണ്ടൻ, മൈലാപ്പു, ആപ്പൂസ്, റുമാനിയ, ബദാമി, സുന്ദരി തുടങ്ങിയ 20 ലധികം മാമ്പഴങ്ങളുടെ വിൽപനയും 30ലേറെ മാമ്പഴങ്ങളുടെ പ്രദർശനവും നഗരയിലുണ്ട്, മാവ് കർഷക സമിതിയിലെ 500-ഓളം കർഷകർ ഉത്പാദിപ്പിക്കുന്ന മാമ്പഴങ്ങളാണ് വിപണത്തിനായി എത്തിച്ചിരിക്കുന്നത്. കാർബൈഡോ, രാസവസ്തുക്കളോ ഉപയോഗിക്കാതെ വൈക്കോലും അറക്കപ്പൊടിയും കാ​ഞ്ഞി​രത്തിന്റെ ഇലയും ഉപയോഗിച്ച് തികച്ചും ജൈവരീതിയിലാണ് പഴുപ്പിച്ചിരിക്കുന്നത്. ഖാദി ബോർഡിന്റെ സാങ്കേതിക സഹായത്തോടെ പ്രവർത്തിക്കുന്ന വ്യത്യസ്ഥ ങ്ങളായ യൂണിറ്റുകളുടെ വൈവിദ്യമാർന്ന ഉൽപന്നങ്ങളും മേളയിലുണ്ട്. കൂടാതെ ചക്കയും ചക്കയിൽ നിർമ്മിച്ച വിവിധയിനം പലഹാരങ്ങളും ചക്കവരട്ടിയത് , ചക്കക്കുരു പൗഡർ തുടങ്ങി 40 ൽ പരം മൂല്യവർ​ദ്ധി​ത ഉത്പന്നങ്ങളും മേളയുടെ പ്രത്യേകതയാണ്. പ്ലാവിൻ തൈകൾ, തേൻ, യു.പി, രാജസ്ഥാൻ എന്നിവിടങ്ങളിലെ വസ്ത്രങ്ങൾ, പച്ചകറി വിത്തുകൾ, ഹാന്റി ക്രാഫ്റ്റ് ഉത്പന്നങ്ങളും മേളയിൽ ഉണ്ട്.