മുണ്ടക്കയം : കേരളത്തിൽ സവർണാധിപത്യം നിലനിൽക്കുന്നതായി എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശൻ പറഞ്ഞു. പുഞ്ചവയൽ ശാഖ പുതിയതായി നിർമ്മിച്ച ക്ഷേത്രത്തിന്റെ സമർപ്പണവും പൊതുസമ്മേളനവും ഉദ്ഘാടനം ചെയ്യുകയായിരുന്നു അദ്ദേഹം. പിന്നാക്ക വിഭാഗത്തിന് ഇപ്പോഴും സംവരണം കുറവാണ്. എല്ലാവർക്കും തുല്യനീതി സർക്കാർ ഉറപ്പുവരുത്തണം. ഈഴവ വിഭാഗം ഇനിയും രക്ത സാക്ഷിയാകാൻ പോകരുതെന്നും അദ്ദേഹം പറഞ്ഞു. ഹൈറേഞ്ച് യൂണിയൻ പ്രസിഡന്റ് ബാബു ഇടയാടിക്കുഴി അദ്ധ്യക്ഷത വഹിച്ചു. നടപ്പന്തൽ സമർപ്പണം ലാലിറ്റ്.എസ്.തകടിയേലും, പ്രാർത്ഥനാഹാൾ സമർപ്പണം അഡ്വ.പി.ജീരാജും നിർവഹിച്ചു. ഷാജി ഷാസ്, ഡോ. പി.അനിയൻ, പി.കെ സജീവ്, പി.എസ് മോഹൻദാസ്, ഗ്രാമപഞ്ചായത്ത് പ്രസിഡന്റുമാരായ കെ.എസ് രാജു, ടി.എം രാജു, റാസി മൗലവി, പി.ജി വസന്തകുമാരി, പി.ഡി ജോൺ, ജെസ്സി ബാബു, പ്രതീഷ് കുമാർ, കെ.എൻ വിജയൻ, ഇ.ആർ പ്രതീഷ് ഈറ്റവേലിൽ എന്നിവർ പ്രസംഗിച്ചു. ആനികുന്നിൽ നിന്നു വാദ്യമേളങ്ങളുടെ അകമ്പടിയോടെ തുറന്ന വാഹനത്തിലാണ് വെള്ളാപ്പള്ളി നടേശനെ പ്രവർത്തകർ സമ്മേളന നഗറിൽ എത്തിച്ചത്.