കണ്ണൂ‌‌‌ർ: കാസർകോഡ് മണ്ഡലത്തിലെ സി.പി.എമ്മിന്റെ ശക്തികേന്ദ്രമായ ചീമേനിയിൽ കൂളിയാട് സ്കൂളിലെ ബൂത്തുകളിൽ 120ലധികം പേരുടെ കള്ളവോട്ട് നടന്നതായാണ് പരാതി. 48ആം നമ്പർ ബൂത്തിൽ രണ്ട് സി.പി.എം പ്രവർത്തകർ പലതവണ വോട്ട് ചെയ്യുന്ന ദൃശ്യങ്ങളും കോൺഗ്രസ് പുറത്തുവിട്ടിട്ടുണ്ട്. കണ്ണൂരിൽ തൊണ്ണൂറ് ശതമാനത്തിലധികം പോളിംഗ് നടന്ന ബൂത്തുകളിലെ വെബ്കാസ്റ്റ‌ിംഗ് ദൃശ്യങ്ങൾ നേടാനായി കോൺഗ്രസ് ശ്രമം തുടങ്ങിക്കഴിഞ്ഞു.

രാഹുൽ എസ്, വിനീഷ് എന്നീ യുവാക്കൾ കള്ളവോട്ട് ചെയ്യുന്ന ദൃശ്യങ്ങളാണ് കോൺഗ്രസ് പുറത്തുവിട്ടിരിക്കുന്നത്. വ്യത്യസ്ത സമയങ്ങളിലായി ഇരുവരും ബൂത്തിൽ വോട്ട് ചെയ്യാനായി നിൽക്കുന്ന ദൃശ്യങ്ങളാണ് കോൺഗ്രസ് പുറത്തുവിട്ടിരിക്കുന്നത്. ഇത്തരത്തിൽ 16 പ്രവാസികളുടെ പേരിൽ കള്ളവോട്ട് നടന്നതായാണ് കോൺഗ്രസ് ആരോപിക്കുന്നത്. കണ്ണൂരിൽ സി.പി.എമ്മിന്റെ ശക്തികേന്ദ്രങ്ങളിലടക്കം 90 ശതമാനത്തിന് മുകളിൽ പോളിംഗ് നടന്ന ബൂത്തുകൾ സംശയത്തിന്റെ നിഴലിലാവുകയാണ്. 20 ബൂത്തുകളിലാണ് 90 ശതമാനത്തിന് മുകളിൽ പോളിങ് എത്തിയത്.

വിവരാവകാശ നിയമപ്രകാരം വഴിയും ഹൈക്കോടതി റിട്ട് വഴിയും വെബ്കാസ്റ്റ‌ി‌ംഗ് ദൃശ്യങ്ങൾ സംഘടിപ്പിക്കാനാണ് യു.ഡി.എഫ് ശ്രമിക്കുന്നത്. അതേസമയം, യു.ഡി.എഫിന്റെ ശക്തികേന്ദ്രങ്ങളിലെ വെബ്കാസ്റ്റ‌ിംഗ് ദൃശ്യങ്ങൾ നേടുന്നതിനായി സി.പി.എം നേതൃത്വവും ശ്രമങ്ങൾ ശക്തമാക്കിയിരിക്കുകയാണ്.