തിരുവനന്തപുരം: ഒമ്പതുവയസുകാരിയെ ലൈംഗികമായി പീഡിപ്പിച്ച സംഭവത്തിൽ തിരുവനന്തപുരം ടെക്നോപാർട്ട് ജീവനക്കാരനെ പൊലീസ് അറസ്റ്റ് ചെയ്തു. ചിത്രകലാ അദ്ധ്യാപകനും കഴക്കൂട്ടത്തെ ടെക്നോപാർക്കിൽ ഗ്രാഫിക് ഡിസൈനറുമായ വിജയ് ആണ് പൊലീസ് പിടിയിലായത്. തന്റെ ഫ്ലാറ്റിൽ വച്ച് കഴിഞ്ഞ മാസം 27നാണ് കേസിനാസ്പദമായ സംഭവം നടന്നത്.

സംഭവത്തിൽ പൊലീസ് പറയുന്നത് ഇങ്ങനെ,​ അവധിക്കാല ചിത്രരചന ക്ലാസിൽ എത്തിയതായിരുന്നു കുട്ടി. ഈ സമയത്ത് വാഹനാപകടത്തിൽ പരുക്കേറ്റിരുന്ന വിജയ് മുറിവിൽ മരുന്ന് പുരട്ടാൻ സഹായിക്കണമെന്ന് പറഞ്ഞ് കുട്ടിയെ മുറിയിൽ കൊണ്ട് പോയി പീഡിപ്പിക്കുകയായിരുന്നു. വീട്ടിൽ മടങ്ങിയെത്തിയ കുട്ടിയുടെ പെരുമാറ്റത്തിൽ അസ്വഭാവികത തോന്നിയ അമ്മയാണ് വിവരങ്ങൾ ചോദിച്ചറിഞ്ഞത്. തുടർന്ന് ശിശുക്ഷേമ സമിതിയെ ബന്ധപ്പെടുകയായിരുന്നു.

തുടർന്ന് സമിതി നടത്തിയ കൗൺസിലിംഗിൽ വിവരങ്ങൾ ചോദിച്ചറിഞ്ഞതോടെ കേസ് തുമ്പ പൊലീസിന് കൈമാറുകയായിരുന്നു. പ്രതിക്കെതിരെ പോക്സോ നിയമപ്രകാരം കേസ് രജിസ്റ്റർ ചെയ്തിട്ടുണ്ട്. അതേസമയം,​ പ്രതിയുടെ ദൃശങ്ങൾ പകർത്തുന്നത് പൊലീസ് വിലക്കി. ടെക്നോപാർക്കിലെ ടൂൺസ് അനിമേഷൻ എന്ന സ്ഥാപനത്തിലെ ഗ്രാഫിക് ഡിസൈനറാണ് വിജയ്.