കൊച്ചി: ഷൂട്ടിങ് സെറ്റിൽ കഞ്ചാവുമായി പുതുമുഖ നടൻ അറസ്റ്റിൽ. കൊച്ചിയിൽ ചിത്രീകരമം നടക്കുന്ന സിനിമയിലെ നായകനും നായകനും കോഴിക്കോട് സ്വദേശിയുമായ മിഥുൻ (25) ആണ് എക്സൈസ് പരിശോധനയിൽ പിടിയിലായത്. കാമറാമാൻ ബെംഗളൂരു സ്വദേശി വിശാൽ വർമയും പിടിയിലായി.
രണ്ടു മാസമായി ഫോർട്ട് കൊച്ചിയിലെ ഫോർട്ട് നഗറിൽ സ്വകാര്യ ഹോംസ്റ്റേയിൽ താമസിച്ചു വരികയായിരുന്നു ഇരുവരും. ഷൂട്ടിംഗ് സെറ്റുകളിൽ മയക്കുമരുന്ന് എത്തിക്കുന്ന സംഘങ്ങളെക്കുറിച്ച് ലഭിച്ച പരാതിയുടെ അടിസ്ഥാനത്തിലായിരുന്നു പരിശോധന. അഭിനയത്തിന്റെ ക്ഷീണം തീർ‌ക്കാൻ പതിവായി മയക്കുമരുന്ന് ഉപയോഗിക്കാറുണ്ടെന്നാണു പ്രതികൾ പറഞ്ഞതെന്ന് എക്സൈസ് അറിയിച്ചു.
സെറ്റുകളിൽ മയക്കുമരുന്ന് എത്തിക്കുന്നവർക്കായുള്ള അന്വേഷണം ശക്തമാക്കിയതായി എക്സൈസ് വ്യക്തമാക്കി. കൊച്ചി എക്സൈസ് സർക്കിൾ ഇൻസ്പെക്ടർ ടി.എസ്.ശശികുമാറിന്റെ നേതൃത്വത്തിൽ നടത്തിയ റെയ്ഡിൽ പ്രിവന്റീവ് ഓഫിസർ ടോണി കൃഷ്ണ, സിവിൽ എക്സൈസ് ഓഫിസർമാരായ ജയറാം, സെയ്ദ്, റിയാസ്, വനിതാ സിവിൽ എക്സൈസ് ഓഫിസർ സജിത എന്നിവർ പങ്കെടുത്തു