1. ഒഡീഷയില്‍ ഫോനി ചുഴലിക്കാറ്റില്‍ ഏഴ് മരണം. ഒഡീഷയില്‍ ശക്തമായ കാറ്റും മഴയും. പുരിയില്‍ കാറ്റ് വീശുന്നത് 245 കിലോമീറ്റര്‍ വേഗത്തില്‍. തിരമാലകള്‍ 9 മീറ്റര്‍ വരെ ഉയരത്തില്‍. നിരവധി വീടുകള്‍ വെള്ളത്തിനടിയിലായി. നിരവധി മരങ്ങള്‍ കടപുഴകി, വീടുകള്‍ തകര്‍ന്നു. പതിനൊന്ന് ലക്ഷം ആളുകളെ ഒഴിപ്പിച്ചു. 13 ജില്ലകളില്‍ റെഡ് അലേര്‍ട്ട് പ്രഖ്യാപിച്ചു. ഭുവനേശ്വറില്‍ കാറ്റിന്റെ വേഗത മണിക്കൂറില്‍ 175 കിലോമീറ്റര്‍. രക്ഷാപ്രവര്‍ത്തനത്തിന് സജ്ജമായി നേവിയും കോസ്റ്റ്ഗാര്‍ഡും. കൊല്‍ക്കത്ത വിമാനത്താവളം 3 മണിക്ക് അടയ്ക്കും. ഫോനി പൂര്‍ണ്ണമായി കരതൊടുന്നതോടെ ചുഴലിക്കാറ്റിന്റെ തീവ്രത കുറയും. തീവ്രത കുറയുന്നതോടെ ഫോനി ബംഗ്ലാദേശ് ഭാഗത്തേക്ക് നീങ്ങും.

2. ഫോനി നേരിടുന്നതിന്റെ ഭാഗമായി ഇന്ത്യന്‍ കോസ്റ്റ് ഗാര്‍ഡ് 34 ദുരന്ത നിവാരണ സംഘങ്ങളെ വിശാഖപട്ടണം, ചെന്നൈ, പാരദീപ്, ഗോപാല്‍പുര്‍, കൊല്‍ക്കത്ത എന്നിവിടങ്ങളില്‍ വിന്യസിച്ചിട്ടുണ്ട്. വിശാഖപട്ടണത്തും ചെന്നൈ തീരക്കും കോസ്റ്റ് ഗാര്‍ഡ് നാല് കപ്പലുകള്‍ വിന്യസിച്ചിട്ടുണ്ട്. സംസ്ഥാനത്ത് 900 ദുരിതാശ്വാസ ക്യാമ്പുകള്‍ തുറന്നിട്ടുണ്ട്. 10,000ത്തോളം ഗ്രാമങ്ങളും 50-ല്‍ അധികം നഗരങ്ങളുമാണ് ഫോനി വീശിയടിക്കാന്‍ സാധ്യതയുള്ള മേഖലയില്‍ ഉള്ളത്. ഒഡീഷാ തീരത്തുകൂടി പോകുന്ന 200-ല്‍ അധികം ട്രെയിനുകളും റദ്ദാക്കിയിട്ടുണ്ട്. അടിയന്തര സഹായമായി കേന്ദ്രം 1086 കോടി അനുവദിച്ചു

3. ഒഡീഷയിലെ ഗഞ്ജം, ഖുദ്ര, ഗജപതി, ജാജ്പൂര്‍, ബാലസോര്‍ എന്നിവിടങ്ങളെയും ബംഗാളിലെ കിഴക്ക്- പടിഞ്ഞാറ് മേദിനിപുര്‍, ആന്ധ്രാ പ്രദേശിലെ ശ്രീകാകുളം, വിജയ നഗരം, വിശാഖപട്ടണം എന്നിവിടങ്ങളെയും കാറ്റ് ബാധിക്കും എന്ന് വിലയിരുത്തല്‍. 90-100 കിലോമീറ്റര്‍ വേഗത്തിലായിരിക്കും ബംഗാളില്‍ കൊടുങ്കാറ്റ് വീശുക. മറ്റൊരു അറിയിപ്പ് ഉണ്ടാകുന്നത് വരെ തീരദേശ ജില്ലകളിലെ വിദ്യാഭ്യാസ സ്ഥാപനങ്ങള്‍ക്കും അവധി പ്രഖ്യാപിച്ചു. 1994ലെ സൂപ്പര്‍ ചുഴലിക്കാറ്റിനു ശേഷം വീശുന്ന ഏറ്റവും ശക്തി ഏറിയ ചുഴലിക്കാറ്റ് ആണ് ഫോനി.

4. ലോക്സഭാ തിരഞ്ഞെടുപ്പിനുള്ള അഞ്ചാം ഘട്ട വോട്ടെടുപ്പിന്റെ പരസ്യ പ്രചാരണം നാളെ അവസാനിക്കും. ഏഴ് സംസ്ഥാനങ്ങളിലെ 51 മണ്ഡലങ്ങളിലേക്ക് ആണ് തിങ്കളാഴ്ച വോട്ടെടുപ്പ് നടക്കുന്നത്. പ്രധാനമന്ത്രി നരേന്ദ്രമോദി രാജസ്ഥാനിലും കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി മധ്യപ്രദേശിലും രാജസ്ഥാനിലും ആണ് തിരഞ്ഞെടുപ്പ് പ്രചാരണ പരിപാടികളില്‍ പങ്കെടുക്കുന്നത്. ജാര്‍ഖണ്ഡില്‍ ആണ് ബി.ജെ.പി ദേശീയ അധ്യക്ഷന്‍ അമിത് ഷായുടെ പ്രചരണം

5. നാളെ അഞ്ച് മണിയോടെ അഞ്ചാം ഘട്ട തിരഞ്ഞെടുപ്പ് നടക്കുന്ന മണ്ഡലങ്ങളില്‍ പരസ്യ പ്രചാരണത്തിനുള്ള സമയം അവസാനിക്കും. 7 സംസ്ഥാനങ്ങളിലെ 51 മണ്ഡലങ്ങളാണ് അഞ്ചാം ഘട്ടത്തില്‍ വിധി എഴുതുന്നത്. അവസാന അഞ്ച് മണ്ഡലങ്ങളിലെ വോട്ടെടുപ്പോടെ ബീഹാറിലെ തിരഞ്ഞെടുപ്പ് പൂര്‍ണമാകും. ഇതിന് പുറമെ ജമ്മു കശ്മീര്‍, രാജസ്ഥാന്‍ എന്നിവിടങ്ങളിലെ തിരഞ്ഞെടുപ്പും അഞ്ചാം ഘട്ടത്തോടെ പൂര്‍ത്തിയാകും. ഇത്തവണ ഏറ്റവും കൂടുതല്‍ മണ്ഡലങ്ങളുള്ളത് ഉത്തര്‍പ്രദേശിലാണ്. 14 മണ്ഡലങ്ങള്‍. ജാര്‍ഖണ്ഡ്, മധ്യപ്രദേശ്, പശ്ചിമ ബംഗാള്‍ എന്നിവയാണ് വോട്ടെടുപ്പ് നടക്കുന്ന മറ്റ് സംസ്ഥാനങ്ങള്‍

6. സംസ്ഥാനത്ത് സ്‌കൂളുകളില്‍ കുട്ടികളുടെ മൊബൈല്‍ ഫോണ്‍ ഉപയോഗം കര്‍ശമനമായി വിലക്കണമെന്ന് ബാലാവകാശ കമ്മിഷന്‍. പുതിയ ഉത്തരവ് ഇറക്കണമെന്ന് വിദ്യാഭ്യാസ വകുപ്പിന് കമ്മിഷന്‍ നിര്‍ദ്ദേശം നല്‍കി. സ്മാര്‍ട്ട് ഫോണുകളുടെ ഉപയോഗം കുറ്റകൃത്യങ്ങളിലേക്ക് നയിക്കാനുള്ള സാഹചര്യം കണക്കിലെടുത്താണ് ഫോണ്‍ നിരോധനം കര്‍ശനമാക്കാനുള്ള നിര്‍ദ്ദേശം

7. നിയമസഭാ ചോദ്യോത്തരങ്ങള്‍ക്ക് സമയബന്ധിതമായി മറുപടി നല്‍കാത്ത വകുപ്പുകള്‍ക്ക് എതിരെ കര്‍ശന നടപടി സ്വീകരിക്കും എന്ന് ചീഫ് സെക്രട്ടറി ടോം ജോസ്. നിയമസഭാ സമ്മേളനങ്ങളില്‍ ഉന്നയിക്കുന്ന പല ചോദ്യങ്ങള്‍ക്കും കൃത്യസമയത്ത് മറുപടി നല്‍കുന്നതില്‍ വിവിധ വകുപ്പുകള്‍ അലംഭാവം കാട്ടുന്നു എന്ന് പ്രതിപക്ഷം നേരത്തെ പരാതി നല്‍കിയിരുന്നു. ഈ പരാതിയുടെ അടിസ്ഥാനത്തില്‍ ആണ് ചീഫ് സെക്രട്ടറിയുടെ പ്രതികരണം

8. കാസര്‍കോടിനും കണ്ണൂരിനും പിന്നാലെ വടകരയിലും കള്ളവോട്ട് നടന്നു എന്ന് ആരോപണം. എല്‍.ഡി.എഫ് പ്രവര്‍ത്തകര്‍ കള്ളവോട്ട് ചെയ്തു എന്ന ആരോപണവുമായി യു.ഡി.എഫ് സ്ഥാനാര്‍ത്ഥി കെ. മുരളീധരന്‍ ജില്ലാ കളക്ടര്‍ക്ക് പരാതി നല്‍കി. തലശ്ശേരി, കൂത്തുപറമ്പ്, നാദാപുരം, നിയമസഭാ മണ്ഡലങ്ങളിലെ ചില മണ്ഡലങ്ങളില്‍ കള്ളവോട്ട് നടന്നു എന്നാണ് യു.ഡി.എഫിന്റെ പരാതി

9. യു.പിയില്‍ എസ്.പി- ബി.എസ്.പി സഖ്യത്തിന് എതിരെ സ്ഥാനാര്‍ത്ഥികളെ നിറുത്തിയ നടപടിയെ ന്യായീകരിച്ച് കോണ്‍ഗ്രസ് അധ്യക്ഷന്‍ രാഹുല്‍ഗാന്ധി. യു.പിയില്‍ മതേതര സഖ്യം മാത്രമേ ജയിക്കുകയുള്ളൂ. കോണ്‍ഗ്രസിന്റെ സ്വാധീനം കുറവുള്ള മേഖലകളില്‍ ബി.ജെ.പിയെ തകര്‍ക്കാന്‍ ആണ് സ്ഥാനാര്‍ത്ഥികളെ നിറുത്തിയത് എന്ന പ്രിയങ്കയുടെ വാക്കുകള്‍ രാഹുലും ആവര്‍ത്തിച്ചു

10. രാജ്യത്ത് സ്വര്‍ണ്ണ ഡിമാന്റ് കൂടുന്നു. ജനുവരി മുതല്‍ മാര്‍ച്ച് വരെയുള്ള കണക്കുകള്‍ പ്രകാരം രാജ്യത്ത് സ്വര്‍ണ്ണ ഡിമാന്റില്‍ 5 ശതമാനത്തിന്റെ വര്‍ധനവ് ആണ് ഉണ്ടായത്. വിവാഹ സീസണില്‍ സ്വര്‍ണ്ണത്തിന്റെ വിലയില്‍ ഇടിവ് വന്നത് വില്‍പ്പന കൂട്ടിയെന്ന് വേള്‍ഡ് ഗോള്‍ഡ് കൗണ്‍സില്‍ റിപ്പോര്‍ട്ടില്‍ പറയുന്നു

11. പ്രധാനമന്ത്രി നരേന്ദ്രമോദിയുടെ ജീവിതം ആസ്പദമാക്കിയുള്ള സിനിമം പി.എം നരേന്ദ്രമോദിയുടെ റിലീസ് തീയതി തീരുമാനിച്ചു. മെയ് 24നാണ് ചിത്രം റിലീസ് ചെയ്യുന്നത്. ഏപ്രില്‍ 11ന് സിനിമ റിലീസ് ചെയ്യാനിരിക്കെ ആയിരുന്നു തിരഞ്ഞെടുപ്പ് കമ്മിഷന്‍ സിനിമയ്ക്ക് വിലക്ക് ഏര്‍പ്പെടുത്തിയത്. തിരഞ്ഞെടുപ്പ് കമ്മിഷന്റെ തീരുമാനത്തില്‍ ഇടപെടാന്‍ സുപ്രീംകോടതി വിസമ്മതിക്കുകയും ചെയ്തിരുന്നു

12. നടി ഭാവന മലയാളത്തില്‍ തിരിച്ചെത്തുന്നത് കാത്തിരിക്കുക ആണ് ആരാധകര്‍. ഒടുവില്‍ ആ ചോദ്യത്തിന് ഭാവന തന്നെ മറുപടിയുമായി രംഗത്ത് എത്തി. മലയാളത്തില്‍ നിന്ന് നിരവധി ഓഫറുകള്‍ വരുന്നുണ്ട്. കന്നഡയില്‍ ചെയ്തു തീര്‍ക്കേണ്ട പ്രൊജക്ടുകള്‍ക്കു ശേഷം മലയാളത്തിലേക്ക് എത്തും എന്നാണ് ഭാവന പറഞ്ഞത്. 96ന്റെ കന്നഡ റീമേക്കായ 99 ആണ് ഭാവനയുടേതായി ഇനി പുറത്തിറങ്ങേണ്ട സിനിമ