ഫ്ലോറിഡ: അമേരിക്കയിൽ 143 യാത്രക്കാരുമായി വിമാനം നദിയിൽ പതിച്ചു. 21പേർക്ക് പരിക്കേറ്റു. ആരുടെയും പരിക്ക് ഗുരുതരമല്ല. ഇവരെ ആശുപത്രികളിൽ പ്രവേശിപ്പിച്ചിരിക്കുകയാണ്. ബോയിംഗ് 737 യാത്രാവിമാനമാണ് ഇറക്കുന്നതിനിടെ ​ഫ്ലോറിഡ​ ജാക്​സൺവില്ലെയിലെ റൺവേയിൽ നിന്ന്​ സെന്റ് ജോൺസ്​ നദിയിലേക്ക്​ തെന്നി വീണത്. വെള്ളിയാഴ്ച രാത്രി 10ഓടെയായിരുന്നു സംഭവം. ശക്തമായ ഇടിമിന്നലിനിടെയാണ് വിമാനം റൺവേയിൽ ഇറങ്ങാൻ ശ്രമിച്ചതെന്നാണ് വിവരം.

ക്യൂബയിലെ ഗ്വാണ്ടനാമോ ബേയിലെ നേവൽ സ്​റ്റേഷനിൽ നിന്ന്​ പറന്നുയർന്ന വിമാനമാണ് അപകടത്തിൽപെട്ടത്. 136 യാത്രക്കാരും ഏഴ് ജീവനക്കാരുമാണ് വിമാനത്തിലുണ്ടായിരുന്നത്. യു.എസ് സൈന്യത്തിനായി ചാർട്ട് ചെയ്ത മിയാമി എയർ ഇന്റർനാഷണൽ എയർലൈൻസിന്റേതാണ്​ വിമാനം. സൈനികരും അവരുടെ ബന്ധുക്കളുമായിരുന്നു യാത്രക്കാരിലേറെയും. അതേസമയം, വിമാനത്തിലെ യാത്രക്കാർ സുരക്ഷിതരാണെന്ന്​​ ജാക്​സൺവില്ലെ മേയർ ട്വീറ്റ്​​ ചെയ്​തു. അപകടത്തിന്റെ വിവരങ്ങൾ പരിശോധിച്ചുവരുന്നതായി ബോയിംഗ് വിമാനക്കമ്പനി വക്താവ് അറിയിച്ചു.