ന്യൂഡൽഹി: ഓരോ തവണ സുഹൃത്തുക്കളുടെ സെൽഫിക്ക് നിന്നുകൊടുക്കുമ്പോഴും പുഞ്ചിരിയോടെ പറയുന്നുണ്ട്, ഇത് അവസാനത്തേതാണെന്ന്. പക്ഷേ, വീണ്ടും അതേപോലെതന്നെ പോസ് ചെയ്തുകൊണ്ടേയിരിക്കും.- പാക് സൈന്യത്തിന്റെ പിടിയിൽനിന്ന് ഇന്ത്യൻ മണ്ണിലേക്ക് തിരികെവന്ന വ്യോമസേന വിംഗ് കമാൻഡർ അഭിനന്ദ് വർദ്ധമാനാണ് കഥയിലെ താരം. തിരികെവന്നതിനുശേഷം ജമ്മുകാശ്മീരിലെ സുഹൃത്തുക്കളുമായി നടത്തിയ ആദ്യ കൂടിക്കാഴ്​ചയുടെ ദൃശ്യങ്ങളാണിപ്പോൾ സാമൂഹ്യമാദ്ധ്യമങ്ങളിൽ വൈറലാകുന്നത്.

സുഹൃത്തുക്കൾ അഭിനന്ദനൊപ്പം ചിരിച്ചുകൊണ്ട്​ ഫോ​ട്ടോയെടുക്കുകയും രാജ്യത്തിന്​ ജയാരവം മുഴക്കുകയും ചെയ്യുന്ന ദൃശ്യങ്ങളാണിവ. എടുക്കുന്ന ചിത്രങ്ങൾ സഹപ്രവർത്തകരുടെ കുടുംബാംഗങ്ങൾക്കുള്ളതാണെന്ന്​ അഭിനന്ദൻ പറയുന്നതും ദൃശ്യത്തിലുണ്ട്​.

ഈ ചിത്രങ്ങൾ എടുക്കുന്നത്​ നിങ്ങൾക്ക്​ വേണ്ടിയുള്ളതല്ല. നിങ്ങളുടെ കുടുംബാംഗങ്ങൾക്കുള്ളതാണ്​. എനിക്ക്​ വേണ്ടി പ്രാർത്ഥിച്ചതിനാണത്​. എനിക്ക് അവരെ കാണാൻ സാധിച്ചിട്ടില്ല. നിങ്ങളും നിങ്ങളുടെ വീട്ടുകാരുമടക്കം എല്ലാവരും എനിക്കു വേണ്ടി പ്രാർത്ഥിച്ചു’- അഭിനന്ദൻ പറഞ്ഞു.

ഫെബ്രുവരി 26ന് ഇന്ത്യ നടത്തിയ ബാലാകോട്ട് എയർസ്ട്രൈക്കിനിടെയാണ് മിഗ് 21 വിമാനം തകർന്നുവീണ് അഭിനന്ദ് പാക് സൈന്യത്തിന്റെ പിടിയിലായത്. മൂന്ന്​ ദിവസത്തെ പാക്​ തടവിൽ നിന്ന്​ മാർച്ച്​ ഒന്നിനാണ്​ അഭിനന്ദൻ മോചിതനായത്​.