മലയാള സിനിമയിൽ നിന്നും വന്ന് തമിഴിലേക്ക് ചേക്കേറി ലേഡി സൂപ്പർ സ്റ്റാറായ താരമാണ് നയൻതാര. ദക്ഷിണേന്ത്യൻ സിനിമകളിൽ ഏറ്റവും കൂടുതൽ പ്രതിഫലം വാങ്ങുന്ന നടി കൂടിയാണ് താരം. നിലവിൽ തമിഴകത്തിന്റെ സൂപ്പർസ്റ്റാർ രജിനികാന്തിനോടൊപ്പം അഭിനയിക്കുന്നതിന്റെ ആവേശത്തിലാണ് നയൻതാര.

അതേസമയം കഴിഞ്ഞുപോയ സിനിമാ ജീവിതത്തിൽ വേണ്ടിയിരുന്നില്ല എന്ന് തോന്നിയ ചിത്രത്തെ കുറിച്ചും കഥാപാത്രത്തെ കുറിച്ചും തുറന്നു പറയുകയാണ് താരം. തമിഴ് നടൻ സൂര്യ നായകനായത്തെത്തിയ ഗജിനി എന്ന ചിത്രത്തിൽ ആ വേഷം ചെയ്യേണ്ടിയിരുന്നില്ലെന്നാണ് താരം ഇപ്പോൾ വെളിപ്പെടുത്തുന്നത്. ഒരു അഭിമുഖത്തിലാണ് ഇക്കാര്യം തുറന്ന് പറയുഞ്ഞത്.

തെന്നിന്ത്യയിൽ ഏറ്റവും കൂടുതൽ പണം വാരി ചിത്രമായ ഗജിനിയിൽ അഭിനയിച്ചത് തന്റെ മോശം തീരുമാനമാണെന്നും നയൻതാര പറയുന്നു. 'സൂര്യ നായകനായ ഗജിനി ചെയ്യാൻ തീരുമാനിച്ചത് എന്റെ കരിയറിലെ ഏറ്റവും മോശം തീരുമാനം ആയിരുന്നു. എന്നോട് തിരക്കഥ പറയുമ്പോഴുള്ളത് പോലെയല്ലായിരുന്നു ചിത്രം പുറത്തുവന്നപ്പോൾ. വളരെ മോശമായിട്ടാണ് എന്റെ കഥാപാത്രത്തെ ചിത്രീകരിച്ചത്. പക്ഷെ, അക്കാര്യത്തിൽ ഞാനാരോടും പരാതി പറഞ്ഞിട്ടില്ല. അത് എനിക്കൊരു പാഠമായിരുന്നു'. നയൻതാര പറഞ്ഞു.

'കഥ ശ്രദ്ധിച്ചു കേൾക്കാൻ തുടങ്ങിയതും മൾട്ടിസ്റ്റാർ ചിത്രങ്ങൾ തിരഞ്ഞെടുക്കുമ്പോൾ രണ്ട് വട്ടം ആലോചിക്കാൻ തുടങ്ങിയതും അതിനു ശേഷമാണ്. രജനി സാറിനൊപ്പം ചന്ദ്രമുഖി ചെയ്യുമ്പോഴും വിജയ്‌ക്കൊപ്പം ശിവകാശി എന്ന ചിത്രത്തിൽ ഒരു പാട്ട് രംഗത്ത് അഭിനയിക്കുമ്പോഴും രണ്ടു വട്ടം ചിന്തിച്ചു. എന്നാൽ ആ രണ്ട് ചിത്രങ്ങളും എനിക്ക് കരിയറിൽ വലിയ നേട്ടമായിരുന്നു.’ നയൻ‌താര കൂട്ടിച്ചേർത്തു.