കൊച്ചി: ബി.ജെ.പി വോട്ടുകൾ കോൺഗ്രസിന് മറിച്ചാലും വടകരയിൽ എൽ.ഡി.എഫ് സ്ഥാനാർത്ഥി പി.ജയരാജൻ വിജയം ഉറപ്പാണെന്ന് എൽ.ജെ.ഡി (ലോക് താന്ത്രിക് ജനതാദൾ)​ ദേശീയ ജനറൽ സെക്രട്ടറി ഡോ.വർഗീസ് ജോർജ് പറഞ്ഞു. എൽ.ജെ.ഡി വോട്ടുകളുടെ പിൻബലത്തിൽ വടകരയിൽ ഇടതുമുന്നണി വിജയിക്കുമെന്നും അദ്ദേഹം കൊച്ചിയിൽ പറഞ്ഞു. തിരഞ്ഞെടുപ്പ് ഫലത്തിന് ശേഷം ദേശിയ തലത്തിൽ സോഷ്യലിസ്റ്റുകളുടെ ഏകീകരണത്തിന് സാദ്ധ്യതയുണ്ട്. എന്നാൽ കേരളത്തിൽ ജെ.ഡി.എസുമായി ലയിക്കുന്ന കാര്യത്തിൽ തത്കാലം ചർച്ചയിൽ ഇല്ലെന്നും വർഗീസ് ജോർജ് വ്യക്തമാക്കി.

കോഴിക്കോടും വടകരയിലും ബി.ജെ.പി വോട്ടു മറിച്ചെന്ന ആരോപണവുമായി സി.പി.എം നേരത്തെ രംഗത്തെത്തിയിരുന്നു. സംഘപരിവാർ വോട്ട് ലഭിക്കാൻ യു.ഡി.എഫ് സ്ഥാനാർഥി എം.കെ രാഘവനും ചില കോൺഗ്രസ് നേതാക്കളും മുന്നിൽ നിന്നെന്നും വടകരയിൽ മുരളീധരനെ സ്ഥാനാർഥിയാക്കിയത് കോൺഗ്രസ് ബി.ജെ.പി ഗൂഢാലോചനയുടെ ഭാഗമായാണെന്നും സി.പി.എം ആരോപിച്ചിരുന്നു.