തിരുവനന്തപുരം: പണം തിരിമറി നടത്തിയ കേസിൽ സഹകരണ ബാങ്ക് മുൻ ജൂനിയർ അക്കൗണ്ടന്റിന് 28വർഷം തടവുശിക്ഷ. കൊല്ലം ജില്ലാ സഹകരണ ബാങ്കിൽ ജൂനിയർ അക്കൗണ്ടന്റായിരുന്ന കൊട്ടാരക്കര പടിഞ്ഞാ​റ്റിൻകര തെങ്ങുവിള വീട്ടിൽ ഷാജഹാനെയാണ് തിരുവനതപുരം വിജിലൻസ് കോടതി കു​റ്റക്കാരനാണെന്ന് കണ്ട് ശിക്ഷിച്ചത്. ഏഴ് കേസുകളിലായി നാല് വർഷം വീതം 28 വർഷം തടവിനും 5,90,000 രൂപ പിഴ അടയ്ക്കാനുമാണ് തിരുവനന്തപുരം വിജിലൻസ് കോടതി ഉത്തരവ്. എല്ലാ കേസുകളിലുമായി ശിക്ഷ ഒരുമിച്ച് അനുഭവിച്ചാൽ മതി.

1997- 98 കാലത്ത് കൊല്ലം ജില്ലാ ബാങ്കിൽ ജൂനിയർ അക്കൗണ്ടന്റായിരുന്ന ഷാജഹാൻ ലെഡ്ജറിൽ വിവിധയാളുകൾ വൻതുകകൾ നിക്ഷേപിച്ചതായി കാട്ടുകയും ദിവസങ്ങൾക്ക് ശേഷം ഈ വ്യക്തികൾ ഷാജഹാന്റെ സ്വന്തം അക്കൗണ്ടിലേക്ക് ഈ തുക മാറ്റാൻ അപേക്ഷിച്ചതായി രേഖയുണ്ടാക്കിയാണ് പണം തട്ടിയത്. ചെക്കുകളുപയോഗിച്ച് ഉപഭോക്താക്കളുടെ അക്കൗണ്ടിൽ നിന്നും 61​1625 രൂപ തിരിമറി നടത്തി തട്ടിയെടുത്തെന്നാണ് വിജിലൻസ് കേസ്. കൊല്ലം വിജിലൻസ് യൂണി​റ്റ് മുൻ ഡിവൈ.എസ്.പിമാരായ സി.ജി. ജയശാന്തിലാൽ, റെക്‌സ് ബോബി അർവിൻ, ജയശങ്കർ, അശോക് കുമാർ തുടങ്ങിയവരാണ് അന്വേഷണം നടത്തി കേസിൽ കു​റ്റപത്റം സമർപ്പിച്ചത്.