തിരുവനന്തപുരം: കൊച്ചി ശാന്തിവനസംരക്ഷണ പ്രവർത്തകർ വെെദ്യുതിമന്ത്രി എം.എം മണിയുമായി നടത്തിയ ചർച്ച പരാജയപ്പെട്ടു. വടക്കൻ പറവൂരിലെ ശാന്തിവനത്തിലെ വൈദ്യുത ടവർ നിർമ്മാണം നിറുത്തിവയ്‌ക്കില്ലെന്ന് മന്ത്രി വ്യക്തമാക്കി. ആശങ്കകൾ അറിയിക്കാൻ വൈകിയെന്ന് മന്ത്രി ശാന്തിവനം സംരക്ഷണ സമിതിയെ അറിയിച്ചു. ഉന്നയിച്ച ആശങ്കകൾ പരിഗണിക്കാമെന്നും എന്നാൽ,​ നിർമ്മാണപ്രവർത്തനങ്ങൾ നിറുത്തിവയ്ക്കാനാവില്ലെന്നും മന്ത്രി സംരക്ഷണ സമിതി ഭാരവാഹികളോട് പറഞ്ഞു. ശാന്തി വനത്തിന്റെ ഉടമ മീനാ മേനോന്റെ നേതൃത്വത്തിലുള്ള സംഘമാണ് മന്ത്രിയുമായി ചർച്ച നടത്തിയത്.

ശാന്തി വനത്തിൽ ടവർ സ്ഥാപിക്കുന്നതിന് എതിരായ സമരം തുടങ്ങിയതിന് ശേഷം ആദ്യമായാണ് മന്ത്രി സമരക്കാരെ കണ്ടത്. ശാന്തിവനം സന്ദർശിക്കാൻ ആവശ്യപ്പെട്ടപ്പോൾ സമയമില്ല എന്നാണ് മന്ത്രി പറഞ്ഞതെന്ന് മീന മേനോൻ പറഞ്ഞു. മന്ത്രിയിൽ വിശ്വാസമുണ്ടെന്നും വിവരങ്ങൾ അന്വേഷിക്കാമെന്ന് മന്ത്രി ഉറപ്പ് നൽകിയതായും ശാന്തിവനം സംരക്ഷണ സമിതി കൺവീനർ കുസുമം ജോസഫ് വ്യക്തമാക്കി.