തൃശൂർ: മലയാളത്തിന്റെ പ്രിയതാരം റിമ കല്ലിങ്കൽ തൃശൂർ പൂരത്തെ കുറിച്ച് നടത്തിയ പരാമർശത്തിനെതിരെ നടി മായ മേനോൻ രംഗത്ത്. തൃശൂർ പൂരം ആണുങ്ങളുടെ മാത്രം പൂരമാണെന്നും വിദേശത്തൊക്കെ വലിയ ആഘോഷങ്ങൾ നടക്കുമ്പോൾ അവിടെ ആണുങ്ങൾ മാത്രമല്ലല്ലോ വരുന്നതെന്നും റിമ ചോദിച്ചിരുന്നു. ഒരു അഭിമുഖത്തിലാണ് താരം ഇക്കാര്യം തുറന്ന് പറഞ്ഞത്.

എന്നാൽ റിമയുടെ പരാമർശത്തെ വിമർശിച്ച് മായ രംഗത്തെത്തി. സഹപ്രവർത്തകയാണെങ്കിലും ഇത്തരം പൊട്ടത്തരം പറഞ്ഞാൽ കേട്ടുകൊണ്ട് നിൽക്കുവാൻ ബുദ്ധിമുട്ടുണ്ടെന്ന് മായ ഫേസ്ബുക്കിൽ കുറിച്ചു. നിങ്ങൾ ശരിയായ ഒരു തൃശൂർകാരിയാണെങ്കിൽ ഇത്തരം വിഡ്ഢിത്തം പുലമ്പില്ലായിരുന്നു. കാരണം, അവിടെ എത്ര പുരുഷന്മാർ വരുന്നുണ്ടോ അത്രയും സ്ത്രീകളും വരാറുണ്ടെന്നതും, അവിടെ പോകാത്ത സ്ത്രീകൾ തികച്ചും വ്യക്തിപരമായ കാരണങ്ങൾ കൊണ്ട് മാത്രം പോകാത്തത് മാത്രമായിരിക്കുമെന്നും മായ വ്യക്തമാക്കി. എബി, മായാനദി, വിജയ്സൂപ്പറും പൗർണമിയും എന്നീ ചിത്രങ്ങളൂടെ ശ്രദ്ധേയമായ നടിയാണ് മായ.

റിമയുടെ അഭിപ്രായവുമായി ബന്ധപ്പെട്ട് നേരത്തെ ഹരീഷ് പേരടിയും രംഗത്തെത്തിയിരുന്നു. തൃശൂർ പൂരം ആണുങ്ങളുടെ പൂരമാണെന്ന് റിമ പറഞ്ഞതിനോട് പൂർണമായും യോജിക്കുന്നില്ലെന്നും എന്നാൽ റിമയ്ക്ക് അഭിപ്രായം പറയാനുള്ള സ്വാതന്ത്ര്യം ഉണ്ടെന്നും ഹരീഷ് പറഞ്ഞു.

ഫേസ്ബുക്ക് കുറിപ്പിന്റെ പൂർണരൂപം

" വിദേശത്തൊക്കെ വലിയ വലിയ ആഘോഷങ്ങള്‍ നടക്കുമ്പോള്‍ അവിടെ ആണുങ്ങള്‍ മാത്രമാണോ, പെണ്ണുങ്ങളും വരുന്നില്ലേ? അതു പോലെ നമുക്കിവിടെ തുടങ്ങാം. #News " - റിമ കല്ലിങ്കൽ

"സഹപ്രവർത്തകയാണെങ്കിലും ഇത്തരം പൊട്ടത്തരം പറഞ്ഞാൽ കേട്ടു കൊണ്ട് നിൽക്കുവാൻ ബുദ്ധിമുട്ടുണ്ട്.... നിങ്ങൾ ശരിയായ ഒരു തൃശൂർകാരിയാണെങ്കിൽ ഇത്തരം വിഡ്ഢിത്തം പുലമ്പില്ലായിരുന്നു.... കാരണം, അവിടെ എത്ര പുരുഷന്മാർ വരുന്നുണ്ടോ അത്രയും സ്ത്രീകളും വരാറുണ്ടെന്നതും,അവിടെ പോകാത്ത സ്ത്രീകൾ തികച്ചും വ്യക്തിപരമായ കാരണങ്ങൾ കൊണ്ട് മാത്രം പോകാത്തത് മാത്രമായിരിക്കും... അല്ലാതെ അവിടെ ഒരു സ്ത്രീയെയും ആരും തടഞ്ഞിട്ടില്ല മാത്രവുമല്ല, നിങ്ങൾ ഒരിക്കലും അവിടെ പോയിട്ടില്ല എന്നും ഇത് കൊണ്ട് മനസ്സിലാക്കുന്നു...!!

-മായ മേനോൻ.