കൊച്ചി: മോദി സർക്കാർ തുടരുമെന്ന എക്‌സിറ്റ് പോൾ പ്രവചനങ്ങളുടെ കരുത്തിൽ ഇന്ത്യൻ ഓഹരികൾ ഇന്നലെ കുതിച്ചുയർന്നു. ബോംബെ ഓഹരി സൂചിക (സെൻസെക്‌സ്)​ 1,​421 പോയിന്റ് മുന്നേറി 39,​352ലും ദേശീയ ഓഹരി സൂചിക (നിഫ്‌റ്റി)​ 421 പോയിന്റുയർന്ന് 11,​828ലുമാണ് വ്യാപാരം പൂർത്തിയാക്കിയത്. തടസമില്ലാത്ത സാമ്പത്തിക പരിഷ്‌കാരങ്ങൾക്കും രാജ്യത്തിന്റെ സാമ്പത്തിക മുന്നേറ്റത്തിനും സ്ഥിരതയുള്ള സർക്കാരാണ് വേണ്ടതെന്ന നിലപാടാണ് നിക്ഷേപകർക്കുള്ളത്. ഇതാണ് വിപണി കുതിച്ചുയരാൻ കാരണം. സെൻസെക്‌സും നിഫ്‌റ്റിയും ഒരുദിനം ഇത്രയും കുതിക്കുന്നത് 2009നുശേഷം ആദ്യമാണ്.

60 സെക്കൻഡിനുള്ളിൽ ₹3.2 ലക്ഷം കോടി

ഇന്നലെ വ്യാപാരത്തുടക്കം മുതൽ ഓഹരികളിൽ മോദി പ്രഭാവം വീശിയടിച്ചു. ആദ്യ 60 സെക്കൻഡിനകം നിക്ഷേപക മൂല്യത്തിലുണ്ടായ വർദ്ധന 3.2 ലക്ഷം കോടി രൂപയാണ്.

₹7.45 ലക്ഷം കോടി

സെൻസെക്‌സിലെ നിക്ഷേപക മൂല്യം ഇന്നലെ വർദ്ധിച്ചത് 5.24 ലക്ഷം കോടി രൂപ. മൂന്നു ദിവസത്തിനിടെ നേട്ടം 7.45 ലക്ഷം കോടി രൂപ.

കരുത്തു കാട്ടി രൂപയും

മോദി തരംഗം ഇന്നലെ രൂപയ്‌ക്കും നേട്ടമായി. വ്യാപാരത്തിനിടെ ഒരുവേള ഡോളറിനെതിരെ 86 പൈസ വരെ രൂപ മുന്നേറി. വ്യാപാരാന്ത്യം 48 പൈസയുടെ നേട്ടവുമായി 69.73ലാണ് രൂപ. കഴിഞ്ഞവാരം മൂല്യം 70.24 ആയിരുന്നു.