കുന്ദമംഗലം: പി.എസ്.സി കോച്ചിംഗ് സെന്ററിലെ ബാത്ത്റൂമിൽ ഒളികാമറ വച്ച് പെൺകുട്ടികളുടെ നഗ്നചിത്രം പകർത്തിയ കേസിൽ കഴിഞ്ഞ ദിവസം പൊലീസ് പിടിയിലായ പരിശീലകനെ താമരശ്ശേരി കോടതി റിമാൻഡ് ചെയ്തു. മഞ്ചേരി താലൂക്ക് ഓഫീസിലെ ഇൻസ്പെക്ഷൻ വിഭാഗത്തിൽ എൽ.ഡി ക്ലാർക്കായ തിരുവനന്തപുരം വെട്ടുകാട് വിപിൻ നിവാസിൽ പ്രവീൺകുമാറിനെ (37) ആണ് റിമാൻഡ് ചെയ്തത്. അവധി ദിവസങ്ങളിൽ പി.എസ്.സി കോച്ചിംഗ് സെന്ററുകളിൽ ഇയാൾ ക്ലാസെടുക്കാറുണ്ട്. കുന്ദമംഗലത്തെ കോച്ചിംഗ് സെന്ററിലെ ബാത്ത്റൂമിൽ പഴയ തുണിയിൽ പൊതിഞ്ഞ് ഇയാൾ സ്ഥാപിച്ചിരുന്ന പെൻകാമറ സ്ഥാപനത്തിലെ ജീവനക്കാരിയാണ് കണ്ടെത്തിയത്. ഇത് നിരീക്ഷിച്ചുകൊണ്ടിരുന്ന പരിശീലകൻ കാമറ തിരികെ ആവശ്യപ്പെട്ടപ്പോൾ ജീവനക്കാരി ബഹളംവച്ച് മറ്റ് ജീവനക്കാരെയും വിദ്യാ‌ർത്ഥികളെയും വിളിച്ചുവരുത്തുകയും കുന്ദമംഗലം പൊലീസിൽ ഏൽപ്പിക്കുകയുമായിരുന്നു. ഇയാൾ മറ്റ് പല സ്ഥാപനങ്ങളിലും ക്ലാസെടുക്കാറുണ്ടെന്ന് പൊലീസ് പറഞ്ഞു.