കിഴക്കമ്പലം: വീടുകൾക്കു മുന്നിൽ കറുത്ത സ്റ്റിക്കറിനു പിന്നാലെ വെളുത്തസ്റ്റിക്കറുകൾ കണ്ടതോടെ പ്രദേശവാസികൾ പരിഭ്രാന്തിയിലായി . കുന്നത്തുനാട് പഞ്ചായത്തിലെ എരുമേലിയിലെ വിവിധ വീടികൾക്കു മുന്നിലെ ഗേറ്റിലാണ് വെളുത്ത സ്റ്റിക്കറുകൾ കണ്ടത്. കഴിഞ്ഞ രണ്ട് ദിവസങ്ങൾക്കു മുമ്പാണ് സ്റ്റിക്കറുകൾ കണ്ടു തുടങ്ങിയത്.

മാസങ്ങൾക്ക് മുമ്പ് കിഴക്കമ്പലം, എടത്തല, കുന്നത്തുനാട് പഞ്ചായത്തുകളിലെ വീടുകളിലെ ജനലുകളിൽ കറുത്ത നിറത്തിലുള്ള സ്റ്റിക്കർ പ്രത്യക്ഷപ്പെട്ടിരുന്നത് പ്രദേശവാസികളെ ഭീതിയിലാഴ്ത്തിയിരുന്നു. കുട്ടികളുള്ള വീടുകൾ കേന്ദ്രീകരിച്ചായിരുന്നു സ്റ്റിക്കർ കണ്ടിരുന്നതെന്നാണ് നാട്ടുകാർ പറയുന്നത്. വെളുത്ത നിറത്തിലുള്ള പ്രത്യേക തരം സ്റ്റിക്കറിന്റെ ഉറവിടമറിയാത്തതിനെ തുടർന്ന് കുന്നത്തുനാട് പൊലീസിൽ അറിയിച്ചു. എസ്.ഐ പി.എ.ഷെമീർ ഖാന്റെ നേതൃത്വത്തിൽ സ്ഥലത്തെത്തി പരിശോധന നടത്തി.

സംഭവത്തിൽ ദുരൂഹതയില്ലെന്നാണ് പൊലീസ് പറയുന്നത്. നേരത്തെ കറുത്ത സ്റ്റിക്കർ പതിപ്പിച്ച സംഭവത്തിന് സമാനമാണിതെന്നും അന്നും ഈ വീടുകളിൽ മോഷണമോ മറ്റ് അനിഷ്ട സംഭവങ്ങളോ ഉണ്ടായിട്ടില്ലെന്നും പൊലീസ് പറഞ്ഞു. ഇരുവശത്തും പശയുള്ള 2 സെന്റീ മീറ്റർ നീളത്തിലുള്ളതാണ് സ്റ്റിക്കറുകൾ. പൊലീസ് ഇത് ശാസ്ത്രീയ പരിശോധനക്കയച്ചു. സംഭവത്തിൽ ആളുകൾ പരിഭ്രാന്തരാകേണ്ടതില്ലെന്നും വിവിധ മാർക്കറ്റിംഗ് കമ്പനികൾ വില്പന കൂടുതൽ ലഭിക്കുന്ന വീടുകൾ തിരിച്ചറിയാൻ ഇത്തരത്തിൽ സ്റ്റിക്കർ പതിപ്പിക്കാറുണ്ടെന്നും സംഭവത്തെക്കുറിച്ച് വിശദമായ അന്വേഷണം നടത്തിവരികയാണെന്നും പൊലീസ് പറഞ്ഞു.