തിരുവനന്തപുരം: കൗമുദി ടി.വിയുടെ ആറാം വാർഷികത്തിന്റെ ഭാഗമായി 26ന് കനകക്കുന്ന് നിശാഗന്ധിയിൽ നടക്കുന്ന മേയ് ഫ്ളവർ മെഗാ ഷോയിൽ സ്പീക്കർ പി. ശ്രീരാമകൃഷ്ണൻ മുഖ്യാതിഥിയാകും. കലാവിരുന്നിന്റെ ഉദ്ഘാടനം മന്ത്രി കടകംപള്ളി സുരേന്ദ്രൻ നിർവഹിക്കും. വൈകിട്ട് ആറിനാണ് കലാ, നൃത്ത വിസ്മയ പ്രകടനങ്ങളുമായി അരങ്ങ് കൊഴുപ്പിക്കുന്ന മേള അരങ്ങേറുന്നത്. പാട്ടും നൃത്തവും കോമഡി ഷോയും ബാൻഡ് പെർഫോമൻസും ഗിന്നസ് റെക്കാഡ് പ്രകടനങ്ങളും ഒത്തുചേരുന്നതാണ് മെഗാ ഷോ.
മെഗാ ഷോയുടെയും കൗമുദി മാട്രിമോണിയൽ വെബ്സൈറ്റിന്റെയും ഉദ്ഘാടനം മന്ത്രി കടകംപള്ളി സുരേന്ദ്രൻ നിർവഹിക്കും. കൗമുദി യൂ ട്യൂബ് ചാനലിന്റെ വരിക്കാർ പത്തു ലക്ഷം കടന്നതിന്റെ ആഘോഷവും ഇതോടൊപ്പം നടക്കും. യൂ ട്യൂബിന്റെ ഉപഹാരം ഗൂഗിൾ യൂ ട്യൂബ് പാർട്ട്ണർ മാനേജർ ഭരത് ഗംഗാധരൻ സ്പീക്കർ പി. ശ്രീരാമകൃഷ്ണന് കൈമാറും. തുടർന്ന് ഉപഹാരം സ്പീക്കർ കേരളകൗമുദി ജോയിന്റ് മാനേജിംഗ് ഡയറക്ടർ ദർശൻ രവിക്ക് സമർപ്പിക്കും. ചടങ്ങിൽ മേയർ വി.കെ. പ്രശാന്ത് അദ്ധ്യക്ഷനാകും. വി.എസ്. ശിവകുമാർ എം.എൽ.എ സംബന്ധിക്കും.
തെന്നിന്ത്യൻ താരസുന്ദരി ഷംനാ കാസിമിന്റെ നൃത്ത പരിപാടിയാണ് മെഗാ ഷോയുടെ ഹൈലൈറ്റുകളിൽ ഒന്ന്. സൂപ്പർ ഹിറ്റ് ഗാനങ്ങൾ കോർത്തിണക്കി പിന്നണി ഗായകൻ സുദീപ് കുമാറും ഗായത്രിയും നയിക്കുന്ന ഗാനമേള കലാവിരുന്നിൽ ആസ്വാദകർക്ക് ഹൃദ്യമായ അനുഭവമായി മാറും. കോമഡി സ്കിറ്റിന് കലാഭവൻ സതീഷ് നേതൃത്വം നൽകും. സെവൻ കോഡ് ബാൻഡ് ആണ് മ്യൂസിക്ക് പെർഫോമൻസിന്റെ മുൻനിരയിൽ. സാംസൺ, അനാമിക, ഷാൻ, ഷിയ തുടങ്ങിയവർ സെവൻ കോഡ് ബാൻഡിന്റെ പെർഫോർമർമാരായി അരങ്ങിലെത്തും.
സംഗീതോപകരണങ്ങളുടെ ശബ്ദാനുകരണത്തിലെ പൂർണതയുമായി വേദികൾ കീഴടക്കിയ ആദർശിന്റെ പ്രകടനവും, വിസ്മയ കാഴ്ചകളൊരുക്കി ഗിന്നസ് ബുക്കിൽ ഇടം നേടിയ സേലം സ്വദേശി സമ്പത്തിന്റെ പ്രകടനവും കാഴ്ചക്കാർക്ക് അനുഭവമാകും.
സുപ്രിയയാണ് മേയ് ഫ്ളവർ 2019ന്റെ മുഖ്യ സ്പോൺസർ. ജ്യോതിസ് സെൻട്രൽ സ്കൂൾ, എസ്.കെ ഹോസ്പിറ്റൽ, ശ്രീധന്യ ഹോംസ് എന്നിവരാണ് സഹ സ്പോൺസർമാർ. 92.7 എഫ്.എം ആണ് റേഡിയോ പാർട്ണർ. മെഗാ ഷോയുടെ പാസുകൾ കേരളകൗമുദി പേട്ട ഓഫീസിൽ നിന്ന് ലഭിക്കും.