തിരുവനന്തപുരം: ഹോട്ടലുകൾക്കും റിസോട്ടുകൾക്കും എൻ.ഒ.സി പോലും ആവശ്യപ്പെടാതെ വൈദ്യുതി കണക്ഷൻ നൽകാൻ ഇറക്കിയ ഉത്തരവ് പുനഃപരിശോധിക്കണമെന്നാവശ്യപ്പെട്ട് ഭരണ പരിഷ്കാര കമ്മിഷൻ ചെയർമാൻ വി.എസ് അച്യുതാനന്ദൻ വൈദ്യുതി വകുപ്പ് മന്ത്രിക്ക് കത്ത് നൽകി. കെ.ഡി.എച്ച് വില്ലേജ്, ബൈസൺവാലി, ചിന്നക്കനാൽ, ശാന്തൻപാറ, വെള്ളത്തൂവൽ, ആനവിരട്ടി, പള്ളിവാസൽ തുടങ്ങിയ വില്ലേജുകളിലെ റിസോർട്ടുകൾക്കും ഹോട്ടലുകൾക്കും മറ്റ് സ്ഥാപനങ്ങൾക്കുമാണ് കണക്ഷൻ നൽകാൻ തീരുമാനിച്ചിരിക്കുന്നത്.

മൂന്നാർ ദൗത്യകാലത്ത് കയ്യേറ്റ ഭൂമി സർക്കാർ ഏറ്റെടുത്ത നടപടികൾ ശരിയാണെന്ന് കോടതികൾ അംഗീകരിച്ചിരിക്കുകയാണ്. കഴിഞ്ഞ എൽ.ഡി.എഫ് സർക്കാരിന്റെ കാലത്ത് തിരിച്ചുപിടിച്ച കയ്യേറ്റങ്ങളും പൊളിച്ചു കളഞ്ഞ നിർമ്മാണങ്ങളുമായി ബന്ധപ്പെട്ട് വിവിധ കോടതികളിൽ നടക്കുന്ന കേസുകളെപ്പോലും ഈ തീരുമാനം പ്രതികൂലമായി ബാധിക്കാനിടയുണ്ട്. ഇത് ഇടതുപക്ഷ നിലപാടിനോട് യോജിക്കുന്നതല്ലെന്നും വി.എസ് കത്തിൽ ചൂണ്ടിക്കാട്ടി.