ന്യൂഡൽഹി : തുടർച്ചയായി രണ്ടാംതവണയും പ്രധാനമന്ത്രി പദത്തിലെത്തുന്ന നരേന്ദ്ര മോദിയുടെ ആദ്യത്തെ വിദേശയാത്ര മാലദ്വീപിലേക്കെന്ന് പി.ടി.ഐ റിപ്പോർട്ട് ചെയ്തു. ജൂൺ പകുതിയോടെയായിരിക്കും മോദി മാലദ്വീപ് സന്ദർശിക്കുക എന്നാണ് റിപ്പോർട്ട്.

എന്നാൽ ജൂൺ ആദ്യവാരമായിരിക്കും നരേന്ദ്രമോദി മാലദ്വീപിൽ എത്തുന്നതെന്നാണ് വിവിധ മാലദ്വീപ് മാദ്ധ്യമങ്ങൾ റിപ്പോർട്ട് ചെയ്യുന്നത്. ലോക്‌സഭ തിരഞ്ഞെടുപ്പിൽ മികച്ച വിജയത്തോടെ രണ്ടാമതും അധികാരത്തിലെത്തിയ നരേന്ദ്രമോദിയെ മാലദ്വീപ് പ്രസിഡന്റ് ഇബ്രാഹിം മുഹമ്മദ് സ്വാലിഹ് അഭിനന്ദനമറിയിച്ചിരുന്നു.

കഴിഞ്ഞ നവംബറില്‍ മാലദ്വീപ് പ്രസിഡന്റ് ഇബ്രാഹിം മുഹമ്മദ് സ്വാലിഹിന്റെ സ്ഥാനാരോഹണ ചടങ്ങില്‍ പങ്കെടുക്കാനും പ്രധാനമന്ത്രി മാലദ്വീപിലെത്തിയിരുന്നു. ഇതിനുപിന്നാലെ വിദേശകാര്യ മന്ത്രി സുഷമ സ്വരാജും മാലദ്വീപ് സന്ദർശിച്ചിരുന്നു