തിരുവനന്തപുരം: കേരളത്തിന്റെ തീരപ്രദേശങ്ങളിൽ ഇസ്ലാമിക് സ്റ്റേറ്റിന്റെ സാന്നിദ്ധ്യമുണ്ടെന്ന ഇന്റലിജൻസ് മുന്നറിയിപ്പിന്റെ പശ്ചാത്തലത്തിൽ സുരക്ഷ ശക്തമാക്കി പൊലീസ്. ഇതിന്റെ ഭാഗമായി ഡി.ജി.പി ലോക്‌നാത് ബെഹ്റ വിവിധ സുരക്ഷാ ഏജൻസികളിലെ ഉന്നത ഉദ്യോഗസ്ഥരുമായി ചർച്ച നടത്തി. നിലവിൽ സ്വീകരിച്ചിട്ടുള്ള സുരക്ഷാനടപടികൾ യോഗം അവലോകനം ചെയ്തു.
ഐ.എസ് ഭീഷണി നേരിടുന്നതുമായി ബന്ധപ്പെട്ട പ്രവർത്തനങ്ങൾ ഏകോപിപ്പിക്കുന്നതിനുള്ള സംസ്ഥാനതല കോർഡിനേറ്ററായി സെക്യൂരിറ്റി വിഭാഗം ഐ.ജി ജി.ലക്ഷ്മണിനെ നിയോഗിച്ചു. കോസ്റ്റ് ഗാർഡിലെ മുതിർ‌ന്ന ഉദ്യോഗസ്ഥരുമായും ഡി.ജി.പി കൂടിക്കാഴ്ച നടത്തി.
സുരക്ഷാ മുന്നറിയിപ്പിന്റെ അടിസ്ഥാനത്തിൽ ആവശ്യമായ മുൻകരുതൽ നടപടികൾ സ്വീകരിക്കാൻ ഐ.ജിമാർ‌ക്കും ജില്ലാപൊലീസ് മേധാവികൾക്കും കോസ്റ്റൽ പൊലീസ് സ്റ്റേഷൻ അധികൃതർക്കും തീരദേശത്തെ പൊലീസ് സ്റ്റേഷനുകൾക്കും നിർദ്ദേശം നൽകിയിട്ടുണ്ട്. തീരപ്രദേശത്തെ ജനങ്ങളുടെ സഹകരണവും സംസ്ഥാന പൊലീസ് മേധാവി അഭ്യർത്ഥിച്ചിട്ടുണ്ട്.