ന്യൂഡൽഹി: വിമാനത്തിലെ ജീവനക്കാരിക്ക് നേരെ മലയാളിയുടെ ലൈംഗിക അതിക്രമം. സംഭവത്തിൽ കോട്ടയം സ്വദേശിയായ അബ്ദുൾ ഷാഹിദ് ഷംസുദ്ദീൻ അറസ്റ്റിൽ. ജിദ്ദയിൽ നിന്ന് ഡൽഹിയിലേക്ക് പോകുകയായിരുന്ന ഇയാൾ വിമാനത്തിലെ ജീവനക്കാരിക്ക് നേരെ പാന്റിന്റെ സിബ് അഴിച്ച് കാണിക്കുകയായിരുന്നു. വിമാനത്തിനുളളിൽ വച്ച് സിഗരറ്റ് വലിക്കുന്നത് തടഞ്ഞതിനുള്ള പ്രതികാരമായിട്ടായിരുന്നു യുവാവിന്റെ അതിക്രമം. സൗദി എയർലൈൻസ് വിമാനത്തിലാണ് സംഭവം.

സിഗരറ്റ് വലിക്കുന്നത് തടഞ്ഞ വിമാനജീവനക്കാരിയെ ആദ്യം ഇയാൾ അസഭ്യം പറഞ്ഞു. തുടർന്ന് ജീവനക്കാരി തന്റെ സഹപ്രവർത്തകരെ സഹായത്തിന് വിളിച്ചപ്പോഴാണ് ഇയാൾ പാന്റിന്റെ സിബഴിച്ച് അശ്ലീലം കാണിച്ചത്. തുടർന്ന് വിമാനം ഡൽഹിയിലെത്തിയതിന് ശേഷം ക്രൂ അംഗങ്ങൾ എയർപോ‌ർട്ട് ഓപ്പറേഷൻ കൺട്രോൾ സെന്ററിലും സി.ഐ.എസ്.എഫിനെയും വിവരമറിയിച്ചു. ഇവ‌ർ പ്രതിയെ പിടികൂടി ഡൽഹി പൊലീസിന് കൈമാറി. ഐ.പി.സി സെക്ഷൻ 354(ലൈംഗികാതിക്രമം), 509(വാക്കുകളിലൂടെയോ പ്രവ‌ൃത്തിയിലൂടെയോ സ്ത്രീയെ അപമാനിക്കുക) എന്നിവയാണ് ഇയാൾക്കെതിരെ ചുമത്തിയിരിക്കുന്നത്.