തിരുവനന്തപുരം: കിഫ്ബി പദ്ധതികൾക്ക് പണം സ്വരൂപിക്കുന്നതിനായി സംസ്ഥാന സർക്കാർ പുറത്തിറക്കിയ മസാലബോണ്ടിനെതിരെ നിയമസഭയിൽ പ്രതിപക്ഷത്തിന്റെ വിമർശനം. സർക്കാർ പുറത്തിറക്കുന്ന മസാലബോണ്ടുകൾ അധിക സാമ്പത്തിക ബാദ്ധ്യത വരുത്തിവയ്ക്കുമെന്ന് പ്രതിപക്ഷം വിമർശിച്ചു. ഇതുമായി ബന്ധപ്പെട്ട് നിയമസഭയിൽ ചർച്ചചെയ്യണമെന്ന് പ്രതിപക്ഷം അടിയന്തര പ്രമേയ നോട്ടീസിൽ ആവശ്യപ്പെട്ടു.

കെ.എസ് ശബരീനാഥൻ എം.എൽ.എ നൽകിയ നോട്ടീസനുസരിച്ച് സഭയിൽ പ്രത്യേക ചർച്ച ആകാമെന്ന് സർക്കാർ നിലപാടെടുത്തു. മസാല ബോണ്ടിലെ വ്യവസ്ഥകൾ ദുരൂഹമാണെന്നും അതുകൊണ്ട് സഭ നിർത്തിവച്ച് വിഷയം ചർച്ച ചെയ്യണമെന്നുമായിരുന്നു പ്രതിപക്ഷം അടിയന്തര പ്രമേയ നോട്ടീസിൽ ആവശ്യപ്പെട്ടത്. ശ്രദ്ധ ക്ഷണിക്കലും സബ്മിഷനും ശേഷം വിഷയം ചർച്ച ചെയ്യാനാണ് തീരുമാനം.

മസാലബോണ്ടുമായി ബന്ധപ്പെട്ട് നേരത്തെയും പ്രതിപക്ഷം ആരോപണങ്ങൾ ഉന്നയിച്ചിരുന്നു. കിഫ്ബി പദ്ധതികൾക്ക് പണം സമാഹരിക്കുന്നതിന് മസാല ബോണ്ട് ഇറക്കാനുള്ള സർക്കാർ തീരുമാനം തിരഞ്ഞെടുപ്പ് കാലത്ത് അടക്കം വലിയ വിവാദമായിരുന്നു. കക്ഷി നേതാക്കളെല്ലാം ചർച്ചയിൽ പങ്കെടുക്കും.