പാലക്കാട്: മാലിന്യപ്രശ്‌നം പരിഹരിക്കുന്നതിനായി ജില്ലാ ശുചിത്വമിഷന്റെ നേതൃത്വത്തിൽ നഗരത്തിലെ തിരക്കേറിയ ഇടങ്ങളിൽ ബയോബിന്നുകൾ സ്ഥാപിക്കുന്നു. 24 ഇടങ്ങളിലാണ് ബയോബിന്നുകൾ സ്ഥാപിക്കുക. ഇതിനു പുറമെ 13 സ്ഥലങ്ങളിൽ തുമ്പൂർമുഴി, എം.സി.എഫ് എന്നിവയും സ്ഥാപിക്കും. ഇത് സംബന്ധിച്ച റിപ്പോർട്ട് സംസ്ഥാന ശുചിത്വമിഷന് സമർപ്പിച്ചു.

ജൈവമാലിന്യങ്ങൾ ശേഖരിക്കുന്നതിനാണ് ബയോബിന്നുകൾ സ്ഥാപിക്കുന്നത്. ഇവയിൽ അജൈവമാലിന്യങ്ങൾ നിക്ഷേപിക്കുന്നത് പരിശോധിക്കാൻ ഹരിതകർമസേനയെ നിയോഗിക്കും. ശേഖരിക്കുന്ന ജൈവമാലിന്യങ്ങൾ നഗരസഭയുടെ മാലിന്യസംസ്‌ക്കരണ കേന്ദ്രത്തിലെത്തിച്ച് ജൈവവളമാക്കി മാറ്റും. പാലക്കാട് നഗരസഭാ പരിധിയിലുള്ള ആണ്ടിമഠംനീലിക്കാട്, കോഴിക്കോട് ബൈപ്പാസ്, ചെട്ടിതെരുവ് പോസ്റ്റൽ ഡിപ്പാർട്ട്‌മെന്റ് ക്വാർട്ടേഴ്‌സ്, മേട്ടുപാളയം സെൻട്രൽ എക്‌സൈസ് ഓഫീസ് ക്വാർട്ടേഴ്‌സ്, കല്ലേപ്പുള്ളി എ.ബി.എസ്.എൻ ക്വാർട്ടേഴ്‌സ്, വിത്തുണ്ണി ദേവി നഗർ, എ.ആർ കോളനി, ഹിദായത്ത് നഗർ, ശാന്തി നഗർ, ബിഗ് ബസാർ, മൂത്താന്തറ, വടക്കന്തറ പോലീസ് ക്വാർട്ടേഴ്‌സ്, ചിറക്കാട്, ശെൽവപാളയം, ഹരിക്കാര സ്ട്രീറ്റ്, പാളയപേട്ട, കല്ലേക്കാട് കോളനി, പാടത്ത് കോളനി, അമ്പപ്പുറം, മുക്കണത്ത് പറമ്പ്, കേനാത്ത് പറമ്പ്, കാടാങ്കോട്, പോലീസ് ക്വാർട്ടേഴ്‌സ് ചിറ്റൂർ റോഡ്, പുത്തൂർ യു.യു.പി സ്‌കൂളിനു സമീപം എന്നിവിടങ്ങളിലായി 47 പോയിന്റുകളിലാണ് ബയോബിന്നുകൾ സ്ഥാപിക്കുക.
കൂടാതെ ശംഖുവാരത്തോട് കോളനി, പൂക്കാരത്തോട്ടം, തോണിപാളയം, ആലംങ്കോട്, ഒലവക്കോട്, രമാദേവി നഗർ, നരിക്കുത്തി ഓവർബ്രിഡ്ജിനു താഴെ, ബി.ഒ.സി റോഡ്, മാട്ടുമന്ത എൻ.ജി.ഒ ക്വാർട്ടേഴ്‌സിനു സമീപം, വിത്തുണ്ണി (ഹ്യുണ്ടായ് ഷോറൂമിനു സമീപം), ടൗൺ സ്റ്റാന്റ് (പബ്ലിക് ടോയ്‌ലറ്റിനു സമീപം), നൂറണി (രുഗ്മിണി നഴ്‌സിംഗ് ഹോമിനു സമീപം), തിരുനെല്ലായിയാക്കര റോഡ് (തങ്കം ഹോസ്പിറ്റലിനു പിറകുവശം) എന്നിവിടങ്ങളിലായി 13 തുമ്പൂർമുഴിയും എം.സി.എഫുകളും സ്ഥാപിക്കും.