പാലക്കാട്: ഗുണനിലവാരമില്ലാത്തതും ഉയർന്നതോതിൽ കീടനാശിനികൾ ഉപയോഗിച്ചതുമായ പഴങ്ങളും പച്ചക്കറികളും അതിർത്തി കടന്ന് കേരളത്തിൽ എത്തുന്നുണ്ടെന്ന പരാതിയുടെ അടിസ്ഥാനത്തിൽ ചെക്ക് പോസ്റ്റുകളിൽ ഭക്ഷ്യസുരക്ഷാ വകുപ്പ് പരിശോധന നടത്തി.

സംസ്ഥാന ഭക്ഷ്യസുരക്ഷാ കമ്മിഷണറുടെ ഉത്തരവ് പ്രകാരം കോഴിക്കോട് മേഖല ഭക്ഷ്യസുരക്ഷാ ഡെപ്യൂട്ടി കമ്മിഷണർ നിയോഗിച്ച സ്‌ക്വാഡ് ഈ മാസം 8,9 തിയതികളിലായി ജില്ലയിലെ വാളയാർ, ഗോവിന്ദാപുരം അതിർത്തി ചെക്ക് പോസ്റ്റുകളിൽ പരിശോധന നടത്തിയിരുന്നു. അന്യസംസ്ഥാനങ്ങളിൽ നിന്നള്ള പച്ചക്കറികൾ, വെളിച്ചെണ്ണ, മത്സ്യം എന്നിവ പരിശോധിക്കുകയും പഴം, പച്ചക്കറി, വെളിച്ചെണ്ണ എന്നിവയുടെ സ്റ്റാറ്റിയൂട്ടറി സാമ്പിളുകൾ വിദഗ്ദ പരിശോധനയ്ക്കായി എറണാകുളം റീജിനൽ അനലിറ്റിക്കൽ ലബോറട്ടറിയിലേക്ക് അയക്കുകയും ചെയ്തിട്ടുണ്ട്. പരിശോധന ഫലം ലഭ്യമായാൽ തുടർനടപടികൾ സ്വീകരിക്കുമെന്നും വരും ദിവസങ്ങളിലും പരിശോധനയുണ്ടാകുമെന്ന് പാലക്കാട് ഭക്ഷ്യസുരക്ഷാ അസിസ്റ്റന്റ് കമ്മിഷണർ അറിയിച്ചു.