പാലക്കാട്: വൈറ്റമിൻ എയും ഡിയും ചേർത്ത മിൽമയുടെ പാസ്ചറൈസ്ഡ് ടോൺഡ് പാൽ വിപണിയിലെത്തി. 20 രൂപ വിലയുള്ള ഈ പാലിന്റെ കവർ നീലയാണ്. രാജ്യത്തെ 70 ശതമാനം ആളുകളിൽ വൈറ്റമിൻ ഡിയുടെയും 62 ശതമാനം കുട്ടികളിലും 16 ശതമാനം ഗർഭിണികളിലും വൈറ്റമിൻ എ യുടെയും കുറവ് കണ്ടെത്തിയതിന തുടർന്നാണ് മിൽമ പുതിയ പാൽ വിപണിയിലെത്തിച്ചത്.

പോഷകാഹാരക്കുറവ് നികത്താൻ ഫുഡ് സേഫ്റ്റി അതോറിട്ടി ഒഫ് ഇന്ത്യയുടെ നിബന്ധനകൾക്ക് വിധേയമായി ലോകബാങ്ക്, നാഷണൽ ഡയറി ഡെവലെപ്‌മെന്റ് ബോർഡ്, ടാറ്റാ ട്രസ്റ്റ് തുടങ്ങിയവയുടെ സഹകരണത്തോടെയാണ് മിൽമ പദ്ധതി നടപ്പാക്കുന്നത്.
ഒരു ഗ്ലാസ് ഫോർട്ടിഫൈഡ് മിൽമ പാലിൽ വിറ്റാമിൻ എ പ്രതിദിന ആവശ്യകതയുടെ ഏകദേശം 47 ശതമാനവും വൈറ്റമിൻ ഡി ഏകദേശം 34 ശതമാനവും ലഭ്യമാകും. ഫോർട്ടിക്കേഷൻ നടത്തുന്നതുമൂലം പാലിന് മണവ്യത്യാസമോ രുചിവ്യത്യാസമോ ഉണ്ടാകില്ല. വൈറ്റമിൻ എ , ഡി എന്നിവ കൂടുതലായി ചേർത്ത ഫോർടിഫൈ ചെയ്ത പാൽ സംസ്ഥാനത്തു എല്ലായിടത്തും ഇനി ലഭ്യമാക്കും. കവറുകളുടെ പുതിയ ഡിസൈൻ പാൽ ഏതെന്നു വേഗത്തിൽ തിരിച്ചറിയാൻ ഉപഭോക്താക്കളെ സഹായിക്കും.