കൊല്ലം: എ.ഐ.വൈ.എഫ് അറുപതാം വാർഷിക ആഘോഷങ്ങളുടെ ഭാഗമായി സ്ഥാപക ദിനമായ ഇന്നലെ എ.ഐ.വൈ.എഫ് പ്രവർത്തകർ കൊല്ലം ജില്ലാ ആശുപത്രി രക്തബാങ്കിൽ രക്തദാനം നടത്തി. കഴിഞ്ഞ ഒരു വർഷമായി ജില്ലയിലുടനീളം അറുപതാം വാർഷികാഘോഷങ്ങളുടെ ഭാഗമായി വിവിധ പരിപാടികൾ നടന്നുവരുകയായിരുന്നു. യുവജന റാലി, സാംസ്ക്കാരിക സദസ്, പൂർവകാല നേതൃസംഗമം, പരിസ്ഥിതി സംരക്ഷണ സദസ് തുടങ്ങി വ്യത്യസ്തങ്ങളായ പരിപാടികളാണ് ഇക്കാലയളവിൽ സംഘടിപ്പിച്ചത്. സാമൂഹ്യ സേവനത്തിൽ യുവജനങ്ങളുടെ ആത്മാർത്ഥമായ ഇടപെടൽ ഉണ്ടാകണമെന്ന സന്ദേശം പങ്കുവച്ചു കൊണ്ടാണ് ജില്ലാ ആശുപത്രിയിൽ എ.ഐ.വൈ.എഫ് ജില്ലാ കമ്മിറ്റി രക്തദാന കാമ്പയിൻ സംഘടിപ്പിച്ചത്. പരിപാടി എ.ഐ.വൈ.എഫ് സംസ്ഥാന പ്രസിഡന്റ് അഡ്വ. ആർ. സജിലാൽ രക്തദാനം നടത്തിക്കൊണ്ട് ഉദ്ഘാടനം ചെയ്തു. എ.ഐ.വൈ.എഫ് നേതാക്കളായ ജഗത് ജീവൻ ലാലി , സി.പി. പ്രദീപ് , അഡ്വ. വിനിത വിൻസെന്റ് , ജി .എസ്. ശ്രീരശ്മി , രാജേഷ് ചിറ്റൂർ എന്നിവർ സംസാരിച്ചു . ആർ. ശരവണൻ , അതുൽ ബി. നാഥ് , വി. വിനേഷ് ,എ . നൗഷാദ് , ആർ. ഷംനാൽ , അരുൺ വി. മോഹൻ എന്നിവർ നേതൃത്വം നൽകി.