തൃശൂർ: ശ്രീകേരളവർമ കോളേജിലെ അദ്ധ്യാപിക ദീപ നിശാന്ത് കവിത മോഷ്ടിച്ചെന്ന വിവാദസംഭവത്തിൽ യു.ജി.സിക്ക് 31നകം റിപ്പോർട്ട് നൽകുന്നതിന് മുന്നോടിയായി ഇന്ന് അടിയന്തരമായി കോളേജിൽ സ്റ്റാഫ് കൗൺസിലിന്റെ യോഗം ചേരും. വകുപ്പു തലവൻമാരും തിരഞ്ഞെടുക്കപ്പെട്ട കൗൺസിൽ അംഗങ്ങളും പങ്കെടുക്കും.
എല്ലാവരുടെയും അഭിപ്രായങ്ങൾ ശേഖരിച്ച് ക്രോഡീകരിച്ച ശേഷമായിരിക്കും റിപ്പോർട്ട് നൽകുക. ദീപ നിശാന്തിന്റെ വിശദീകരണവും ആവശ്യപ്പെട്ടിട്ടുണ്ടെന്നും അത് റിപ്പോർട്ടിനൊപ്പം ചേർക്കുമെന്നും പ്രിൻസിപ്പൽ ഈശ്വരി പറഞ്ഞു.

കൊച്ചിൻ ദേവസ്വം ബോർഡിന്റെ കീഴിൽ വരുന്ന കോളേജ് ആയതിനാൽ ബോർഡിന്റെ അഭിപ്രായവും റിപ്പോർട്ടിൽ ഉൾപ്പെടുത്തും. കവിതാ മോഷണവുമായി ബന്ധപ്പെട്ട് കോളേജിന് ഇതുവരെയും പരാതി ലഭിച്ചിട്ടില്ല. കോളേജ്തല അന്വേഷണം നടത്തിയിട്ടുണ്ടെങ്കിൽ അതിന്റെ റിപ്പോർട്ടും സമർപ്പിക്കണമെന്ന് യു.ജി.സി നിർദ്ദേശിച്ചിരുന്നു.
അങ്ങനെയിരിക്കെ മരിച്ചുപോയി ഞാൻ/നീ' എന്ന ശീർഷകത്തിൽ കവി എസ്. കലേഷ് 2011ൽ ബ്ലോഗിൽ പ്രസിദ്ധീകരിച്ച കവിതയിലെ വരികളാണു ദീപ നിശാന്ത് സ്വന്തമെന്ന മട്ടിൽ പ്രസിദ്ധീകരിച്ചതും വിവാദമായതും. അദ്ധ്യാപികയുടെ സത്യസന്ധതയെ ചോദ്യം ചെയ്തു കൊണ്ട് ലഭിച്ച പരാതിയിലാണ് യു.ജി.സിയുടെ ഇടപെടൽ. തൃശൂർ സ്വദേശി സി.ആർ. സുകുവാണ് കവിതാ മോഷണ വിവാദത്തിന്റെ പശ്ചാത്തലത്തിൽ അദ്ധ്യാപികയ്‌ക്കെതിരെ യു.ജി.സിക്ക് പരാതി നൽകിയത്. 31ന് പ്രിൻസിപ്പൽ ഈശ്വരി റിട്ടയർ ചെയ്യും.